Ásmundur Friðriksson, þingmaður Sjálfstæðisflokksins, lagði það til á Alþingi í dag að meiri virðing væri borin fyrir hefðum Alþingis þegar kemur að klæðaburði þingmanna. Mbl.is greinir frá að í ræðu sinni hafi Ásmundur lýst áhyggjum sínum af þessari tilslökun hefða. Nefndi hann að löng hefð væri fyrir því að þingmenn væru snyrtilegir á fundum nefnda þingsins og í þingsal. Almenna reglan væri að karlar væru í jakka, en konur hefðu úr fjölbreyttari klæðnaði að velja.
„Ég legg það til, svo við förum ekki öll í jólaköttinn, að við tökum okkur taki og berum virðingu fyrir klæðnaði hér í þingsal. Að við komum þannig hingað inn að við berum virðingu fyrir þeirri sögu sem tilheyrir þessu húsi og því starfi sem við erum að vinna og sýnum það í framkomu okkar og klæðnaði að við séum á háttvirtu Alþingi.“
Fannst Ásmundi þessar reglur vera síbrotnar og klæðnaður sumra þingmanna, gallabuxur, stæðust varla reglur þingsins.
Til upprifjunar má minnast þess þegar Elín Hirst, þáverandi þingmaður Sjálfstæðisflokksins, var áminnt fyrir að vera í gallabuxum í þingsalnum árið 2013.
Þá kallaði Brynjar Níelsson, þingmaður Sjálfstæðisflokksins, Björn Leví Gunnarsson, þingmann Pírata, „niðursetning“ á sokkaleistunum fyrr á þessu ári, en Björn Leví útskýrði fyrir Eyjunni að þar sem hann er nokkuð heitfengur, kjósi hann heldur að fara úr skónum, í stað þess að fara úr jakkanum, þar sem honum sé oft heitt.
