Þórlaug Ágústsdóttir frambjóðandi Pírata í Reykjavík segir flokkinn eiga í leiðtogakrísu. Þórlaug, sem var í þriðja sæti á lista flokksins í síðustu borgarstjórnarkosningum, segir að innan Pírata sé mikið af fólki sem langi að breyta heiminum en skorti til þess reynslu. Vandinn sé sá að þeir sem hafi reynsluna langi ekki til að verða borgarfulltrúar.

„Það er ákveðin leiðtogakrísa í gangi. Það vildi enginn vera fyrstur til að stíga fram. Þegar ég geri það þá kemur ákveðin skotskífa á mig. Ég ætlaði að sýna samfellu, þegar Halldór Auðar [oddviti flokksins] segir að hann ætli að hætta þá stíg ég upp neðar af listanum. Það var ekki vinsælt í ákveðnum hóp innan flokksins,“

segir Þórlaug í viðtali í helgarblaði DV. Hún segir Pírata veikburða. „Við erum ungur og veikburða flokkur, það er mikið af fólki sem einfaldlega skortir starfsreynslu og er þarna því það langar að breyta heiminum. Þeir sem eru komnir sem reynsluna til að geta það, þá langar ekki í starfið.“