Myndband af pari í ástaratlotum í Breiðholtslaug fór sem eldur í sinu um samfélagsmiðla í vikunni. Myndbandið var tekið upp af skjá öryggismyndavélar af starfsmanni laugarinnar sem sendi það út til fylgjenda sinna á Snapchat. Aðrir notendur tóku síðan skjáskot af myndbandinu og fóru myndirnar víða. Samkvæmt forstöðumanni laugarinnar er málið litið alvarlegum augum en gripið hafi verið til aðgerða til þess að koma í veg fyrir að nokkuð þessu líkt eigi sér stað aftur.

Hafa tryggt að þetta komi ekki fyrir aftur

Umrætt myndband var tekið upp um miðjan dag í Breiðholtslaug í heitum potti undir útsýnissturni sundlaugavarða. Þar má sjá mann veita konu munnmök í ylvolgu vatninu. Ástaratlotin voru tekin upp á öryggismyndavél og tók starfsmaður laugarinnar afrit af verknaðinum og sendi út á Snapchat. Fram kemur að ungt barn hafi setið nærri í pottinum. Eins og áður segir vöktu myndirnar af fangbrögðunum mikla athygli á samfélagsmiðlum og bárust fregnirnar inn á borð stjórnenda sundlaugarinnar.

„Við lítum málið alvarlegum augum og tókum þegar á því. Við funduðum með starfsfólki og gripum til aðgerða sem ættu að tryggja að ekkert þessu líkt gerist aftur,“ segir Sólveig Valgeirsdóttir, forstöðumaður Breiðholtslaugar. Að hennar sögn hefur trúnaðarbrot sem þetta ekki átt sér stað áður. Hún staðfesti ekki hvort starfsmaðurinn hefði fengið reisupassann.

Aðspurð hvort að óvænt ástaratlot gesta séu tíður viðburður í lauginni þá þvertekur Sólveig fyrir það. „Slíkt gerist nánast aldrei. Í þau örfáu skipti sem gestir fara út fyrir einhver mörk þá hefur dugað að starfsmenn biðji gesti að láta af þessari iðju,“ segir Sólveig.