Við á matarvefnum erum alltaf til í að prufa nýja hluti og ákváðum að reyna við ketó köku á dögunum. Uppskriftin hér fyrir neðan varð fyrir valinu, en hún er af bloggsíðunni Better Than Bread Keto. Ástæðan fyrir því að við völdum hana var einfaldlega sú hve ofboðslega auðveld þessi uppskrift virkaði.
Við urðum ekki svikin af þessari köku og er æðislegt að eiga svona lágkolvetnabombu í ísskápnum eða frystinum til að narta í eftir langan vinnudag. Þessari mælum við heilshugar með.
Hráefni:
1 bolli möndlumjöl
4 msk. smjör
¾ bolli rjómi, þeyttur
½ bolli fersk jarðarber
225 g mjúkur rjómaostur
2 – 3 tsk. Erythritol (malað sem minnir á sykur. Hér má nota allt að ½ bolla – okkur á matarvefnum finnst bara betra að nota minna af þessu sætuefni)
Aðferð:
Bræðið smjör og blandið saman við möndlumjölið. Þrýstið blöndunni í botninn á litlu, eldföstu móti eða kökuformi. Ekki hafa formið stærra en sirka 17 sentímetra að ummáli. Skerið jarðarberin smátt eða maukið þau í blandara. Þeytið rjómann og blandið honum saman við rjómaostinn, Erythritol og jarðarberin. Hellið þessu yfir botninn og kælið í að minnsta kosti klukkutíma. Þessi kaka endist og endist í frysti og minnir á ístertu þegar hún er frosin.
