„Hann er í krakkakökum en er samt duglegur að prófa nýja hluti. Hann fer eftir óskum þeirra sem eiga að fá kökuna og það finnst mér gott. Hann virðist æfa sig í því sem óskað er eftir og það sýnir að hann þorir að prufa eitthvað nýtt,“ segir sykurmassa sérfræðingurinn Sóley Guðbjörnsdóttir.

Sóley rekur Konditorbutiken í Varberg á vesturströnd Svíþjóðar og hefur vart undan að skreyta kökur eftir pöntun og halda kökugerðarnámskeið. Við fengum hana til að líta yfir feril Bjarna Benediktssonar, fjármálaráðherra, í kökuskreytingum og gefa honum góð ráð um hvernig hann geti fullkomnað kökuskreytingartækni sína enn frekar.

„Mér finnst hann sko duglegur,“ segir Sóley er hún hefur horft á víðfrægt myndband af Bjarna búa til köku sem notað var í kosningabaráttu Sjálfstæðisflokksins. Hún segir þó að hann geti enn blómum á sig bætt er varðar sjálfa tæknina við að skreyta með sykurmassa.

„Hann má vinna meira í fínpússi, hreinsa tertuna betur til og snyrta. Hann má hafa í huga að grunnurinn er mikilvægur. Mitt ráð til hans er að slétta betur úr smjörkreminu áður en hann setur sykurmassann á. Þá verður tertan sjálf sléttari og fínni.“

Sjá einnig: Bjarni sýnir baksturssnillina enn á ný.

Býður Bjarna á námskeið í Svíþjóð

Bjarni hefur verið iðinn við kolann í kökum fyrir krakka, með tilheyrandi fígúrum og smáatriðum. Heilt yfir er Sóley ánægð með fígúrúrnar hans.

„Hann er duglegur að gera fígúrur en aftur er það fínpússningin sem hann má gefa sér meiri tíma í.“

En hvað getur Bjarni gert til að fullkomna sína kökuskreytingartækni?

„Ég mæli með að hann fari á grunnnámskeið til að bæta sig,“ segir Sóley og bætir við að hún vilji glöð bjóða honum á námskeið til sín ef hann leggur land undir fót.

„Hann er velkominn á einkanámskeið hjá mér ef hann ákveður að drífa sig til Svíþjóðar,“ segir hún.

Svo er það stóra spurningin: Gæti Bjarni söðlað um, lagt pólitískan feril með öllu sínu þrasi á hilluna og öðlast eilítið rólegri frama í kökuskreytingum?

„Ef hann fer á grunnnámskeið held ég að hann sé tilbúinn að vinna við þetta. Hann væri velkominn í vinnu hjá mér, því ef hann er svona duglegur að baka heima fyrir þá er ekkert mál að hjálpa honum að fullkomna tæknina.“