Tvítug kona lést eftir að hafa farið í teygjustökk á dögunum. Atvikið átti sér stað í Colorado í Bandaríkjunum þann 4. janúar síðastliðinn í Silo-trampólíngarðinum í Grand Junction.

Ekki er vitað hvað fór úrskeiðis en rannsókn á öryggisbúnaði eftir slysið leiddi í ljós að hann var í lagi. Frekari rannsókn mun þó fara fram.

Fallið sem um ræðir var um rúmir tuttugu metrar og er konan, Ciara Romero, sögð hafa verið hikandi áður en hún lét vaða. Á myndbandi má sjá starfsmenn kanna öryggisbúnaðinn áður en hún stökk og virtist allt vera í himnalagi.

Að því er News Channel 5 greinir frá er ein kenning sú að önnur hönd Romero hafi flækst í teygjunni og opnað öryggisfestingu í stökkinu með fyrrgreindum afleiðingum.