Sala beint frá býli hefur stóraukist
Sala beint frá býli er starfsleyfisskyld. Matvælalög kveða skýrt á um að hver sá sem dreifir matvælum skuli hafa leyfi yfirvalda til þess. Þetta kemru fram í tilkynningu frá Matvælastofnun.
Mikil aukning hefur orðið á milliliðalausri sölu lambakjöts í kjölfar lækkunar sláturleyfishafa á verði til bænda. Fram kemur í tilkynningunni að leyfi þurfi bændur að hafa annað hvort frá heilbrigðiseftirliti viðkomandi sveitarfélags eða Matvælastofnun.
„Í ljósi mikillar aukningar á sölu matvæla beint frá býli hvetur Matvælastofnun alla þá bændur sem ekki hafa nú þegar gilt starfsleyfi og vilja selja beint frá býli að sækja án tafar um starfsleyfi til stofnunarinnar sé búfjárhald meginstarfsemi þeirra. Sé búfjárhald ekki meginstarfsemi þeirra þá sækja þeir um starfsleyfi til heilbrigðiseftirlits í héraði.“
Fram kemur að tilgangur matvælalaga sé að tryggja neytendum örugg matvæli eins og kostur sé. „Í dreifingu matvæla felst hvers konar flutningur, framboð og afhending, þar með talið innflutningur, útflutningur og sala. Hér er einnig átt við geymslu og annað sem tengist dreifingu. Umsóknum um starfsleyfi frá Matvælastofnun skal skilað inn rafrænt í þjónustugátt MAST á heimasíðu stofnunarinnar www.mast.is.“