Útvarpsmaðurinn Frosti Logason, annar stjórnandi Harmageddon á X-inu og pistlahöfundur hjá Fréttablaðinu, svífur um á bleiku skýi þessa dagana. Á sunnudag kom frumburður hans og Helgu Gabríelu, unnustu hans, í heiminn.
„Hamingja mín og lukka á sér engin takmörk. Ástin mín, hún Helga Gabríela ól okkur heilbrigðan og fallegan dreng. Hann var fjórtán merkur og 51 sentímetri, á settum degi í gær klukkan 17:32,“ segir Frosti en hann og heilsubloggarinn Helga Gabríela trúlofuðu sig fyrr á árinu.
Frosti greinir frá því að allt hafi gengið að óskum.
„Móður og barni heilsast vel og faðirinn bókstaflega grætur af gleði.“
