Framsóknarmenn vilja halda flokksþing til að skera úr um hvort Sigmundur Davíð Gunnlaugsson verði áfram formaður og leiði flokkinn í kosningarnar í haust. Þetta sagði Silja Dögg Gunnarsdóttir þingmaður flokksins í þættinum Vikulokin á Rás 1 í morgun.

Hún sagði að Wintrismálið og Panamaskjölin hefðu skaðað formanninn en að Framsóknarmenn virði afrek Sigmundar Davíðs. Þar sem hann hefur ákveðið að gefa áframhaldandi kost á sér þurfi því að halda flokksþing: „Hann er formaður flokksins og svo þurfa bara flokksmenn að fá tækifæri til að segja sína skoðun. Stjórnmálamenn eiga að vera umdeildir. Annars eru þeir ekki neitt,“ sagði Silja Dögg.

Silja Dögg sagði Wintrismálið hafi verið mjög erfitt, en að sama skapi eru margir Framsóknarmenn mjög hrifnir af Sigmundi og líta á málið sem ein stór mistök: „Viðtalið í Kastljósi var hræðilegt og skaðaði Sigmund. En horfi menn á heildarmyndina og hvers konar leiðtogi Sigmundur hefur verið og hvaða málefni hann hefur leitt, hvað mynd blasir þá við?“ Hús segir árangurinn hafa verið mikinn, húsnæðislán hafi verið leiðrétt, afnám hafta gangi vel og að efnahagurinn sé mjög góður, ásamt fleiru.

Silja vildi ekki spá fyrir um hvort flokksmenn vildu hafa Sigmund áfram sem formann Framsóknarflokksins og vildi ekki gefa upp hvort hún hygðist styðja hann.