Margrét Gauja Magnúsdóttir, bæjarfulltrúi Samfylkingarinnar í Hafnarfirði, viðurkenndi á Facebook-síðu sinni í morgun að það hafi verið hún sem öskraði á bæjarstjórnarfundi í gær. Fjarðarfréttir fullyrtu í morgun að öskur ónefnds bæjarfulltrúa hafi heyrst út á götu þegar meirihluti bæjarstjórnar Hafnarfjarðar samþykkti í gær á hitafundi að víkja Borghildi Sturludóttur og Pétri Óskarssyni úr nefndum og ráðum sem þau hafa setið í fyrir hönd Bjartrar framtíðar. Björt framtíð myndar meirihluta með Sjálfstæðisflokknum í Hafnarfirði.
Margrét Gauja hefur nú fjarlægt færsluna af Facebook en svo hljóðaði hún: „Til að árétta það, þá var það ég sem missti stjórn á skapi mínu og öskraði þegar ákveðin bæjarfulltrúi ætlaði að setja sig á stall gagnvart öðrum á siðferðislegum grunni. Þetta var í fundarhlé, þetta hefur ekki gerst áður og mun vonandi ekki gerast aftur. Og vonandi mun ég aldrei upplifa svona bæjarstjórnarfund aftur fer á topp 5 listann sem sá súrasti.“
Hún setti þó inn nýja færslu þar sem hún tekur örlítið vægar til orða. „Bæjarstjórnarfundurinn í gær fer á topp 3 listann hjá mér yfir þá verstu sem ég hef upplifað. p.s. ég er ein af þeim sem snöggreiddist í fundarhlé þegar það átti að taka mig á frítt námskeið um siðferði. Í fyrsta og vonandi síðasta skiptið, ég kann mjög illa við öskrandi mig,“ segir hún nú.
Guðlaug Kristjánsdóttir, forseti bæjarstjórnar Hafnarfjarðar, lagði til á bæjarstjórnarfundi í gær að víkja Borghildi Sturludóttur og Pétri Óskarssyni úr nefndum og ráðum sem þau hafa setið í fyrir hönd Bjartrar framtíðar. Guðlaug sagði sig úr Bjartri framtíð ásamt Einari Birki Einarssyni bæjarfulltrúa fyrr í mánuðinum. Samkvæmt heimildum DV mun ágreiningurinn innan Bjartrar framtíðar í Hafnarfirði hafa snúist um byggingu knatthúsa.
„Það er búið að vera mjög erfið staða innan okkar hóps í marga mánuði. Óeining. Og það keyrði um þverbak þegar ég fór í veikindaleyfi um daginn. Staðan var orðin mjög erfið, þau tvö og aðrir farin í viðræður við aðra flokka um framboð og ósátt við restina af hópnum. Í mínu veikindaleyfi var staðan orðin þannig að ég þurfti að koma til baka og stilla til friðar, það var það sem ég gerði í gær,“ segir Guðlaug í samtali við DV.
„Það er aldrei þægilegt að deila við vini sína en þetta var staðan sem kom upp og þurfti að klára.“
Það var mikill hitafundur í gær, hvernig blasti þetta við þér?
„Það var Samfylkingin sem hitaði fundinn upp í gær. Ég var búin að hafa samráð við alla oddvita fyrir fundinn og láta vita um allar lagalegar hliðar, sem spurt var um af oddvita Samfylkingarinnar í pontu í gær, það var búið að svara þeim öllum fyrir fundinn og ræða þessu viðkvæmu stöðu sem var komin upp. Það kom mér algjörlega í opna skjöldu, ég vildi hafa þetta eins lágstemmt og hægt var því þetta eru vinir mínir og ekki draga þetta í fjölmiðla. Einhverjum þótti nú ástæða til þess samt og mér þykir það mjög miður.“
