Jose Mourinho, stjóri Manchester United skaut föstum skotum að Antonio Conte, stjóra Chelsea í kvöld.

Á dögunum skaut Mourinho létt á þá Jurgen Klopp og Antonio Conte og sagði að þeir félagar höguðu sér stundum eins og trúðar á hliðarlínunni.

Mourinho dró hins vegar í land með þau ummæli í kvöld og sagði að enska pressan hefði snúið út úr þeim.

Conte gaf hins vegar í skyn að Mourinho þjáðist af minnisleysi og lét þau ummæli falla í viðtali í dag og það virðist ekki hafa farið neitt sérstaklega vel í Portúgalann.

„Pressan á að biðja mig og hann afsökunar. Það var snúið út úr spurningunni og svarinu mínu og þess vegna þessi viðbrögð hjá öllum. Ég var að tala um sjálfan mig og að það væri ég sem hagaði mér eins og trúður á hliðarlínunni,“ sagði Mourinho.

„Annars þarf ég ekki stjóra Chelsea til þess að segja mér að ég hafi gert mín mistök og muni gera þau í framtíðinni. Það eina sem ég mun segja er að ég mun aldrei fara í bann fyrir veðmálasvindl,“ sagði stjórinn að lokum.