Mágur hans segir hann hafa unnið samfellt í 154 klukkutíma
Tónlistarmaðurinn Prince hafði ekki sofið í sex daga áður en hann fannst látinn á heimili sínu í Minnesota að morgni fimmtudags. Þetta segir mágur söngvarans sem var 57 ára þegar hann lést.
„Ég var með honum um síðustu helgi. Hann hafði unnið samfellt í 154 klukkutíma,“ sagði Maurice Phillips, sem er kvæntur Tyka Nelson, systur Prince, í samtali við bandaríska fjölmiðla. 154 klukkutímar eru rétt rúmir sex dagar.
Ekki er vitað hvað varð Prince að aldurtila en lík hans var brennt á föstudag. Mikið hefur verið skrifað og skrafað um hugsanlega dánarorsök og eru vinir söngvarans sagðir hafa haft áhyggjur af notkun tónlistarmannsins á lyfseðilsskyldum verkjalyfjum og mögulega hafi notkun hans á þessum lyfjum átt þátt í dauða hans.
Fregnir af meintu svefnleysi hans virðast þó ekki koma heim og saman við fregnir af notkun hans á verkjalyfjum á borð við Percocet sem hefur sljófgandi áhrif. Ekki er útilokað að Prince hafi notað önnur lyf og hefur verið fullyrt að talsvert magn lyfseðilsskyldra lyfja hafi fundist á heimili hans. Ekki er talið að Prince hafi tekið of stóran skammt viljandi eða svipt sig lífi.
„Sjúkrasaga hans er meðal þess sem lögregla er með til skoðunar,“ hefur breska blaðið Mirror eftir heimildarmanni.
