Þetta kom fram í máli Pútíns á fundi með fulltrúum erlendra fjölmiðla í tengslum við árlega efnahagsráðstefnu í Rússlandi í gær. Reuters greinir frá.
Á fundinum sagði Pútín að yfirvöld í Moskvu væru tilbúin að semja um frið en að úkraínsk stjórnvöld yrðu að samþykkja þær málamiðlanir sem ræddar hefðu verið á fundi hans með Trump í Anchorage í Alaska á síðasta ári.
„Úkraínumenn verða að samþykkja þessar málamiðlanir. Þá mun átökunum ljúka fljótt með eðlilegum hætti,“ sagði Pútín.
Hann sagðist hins vegar ekki sjá nein merki um að stjórnvöld í Kænugarði væru tilbúin til þess og lagði áherslu á að rússneski herinn myndi halda áfram sókn sinni ef samkomulag næðist ekki.
Pútín ítrekaði jafnframt kröfur Rússa um að Úkraína afsali sér þeim hlutum Donbas-svæðisins sem enn eru undir stjórn úkraínskra yfirvalda. Volodímír Selenskí Úkraínuforseti hefur hafnað þeirri kröfu og sagt hana jafngilda uppgjöf.
Pútín sagði enn fremur að staða Rússa á vígvellinum væri að styrkjast og fullyrti að Rússar hefðu nú náð fullum yfirráðum yfir Lúhansk-héraði og meira en 85 prósentum Donetsk-héraðs. Hann sagði einnig að Rússland byggi yfir hergögnum sem Úkraína hefði ekki aðgang að og að tíminn ynni með Rússum í stríðinu.
Að sögn Pútíns er Rússland því reiðubúið að binda enda á stríðið með samningum, en ef ekki náist samkomulag muni það leitast við að ná markmiðum sínum með hervaldi.
Stríðið í Úkraínu hefur nú staðið yfir í rúm fjögur ár.
