Enska landsliðið ætlar að grípa til óvenjulegra aðgerða fyrir Heimsmeistaramótið í sumar til að tryggja leikmönnum sem bestan svefn á meðan mótið stendur yfir í Bandaríkjunum, Kanada og Mexíkó.

Samkvæmt enskum miðlum mun enska knattspyrnusambandið útvega leikmönnum sérsniðna yfirdýnur, kælipúða og sérstök svefnsett fyrir dvölina á liðshótelinu í Kansas. Ástæðan er meðal annars kvartanir fyrri gesta yfir hörðum rúmum, óþægilegum púðum og lélegri hljóðeinangrun á hótelinu.

Thomas Tuchel landsliðsþjálfari leggur mikla áherslu á svefn og endurheimt leikmanna og hefur fengið svefnsérfræðinga frá UK Sports Institute til samstarfs við enska landsliðið.

Sérstakir kælipúðar eiga að hjálpa leikmönnum að halda líkamshitanum niðri í miklum hita og raka sem búist er við á mótinu.

Búnaðurinn verður sérsniðinn að hverjum leikmanni út frá líkamsbyggingu, þyngd og svefnvenjum. England vonast til að þessi smáatriði geti hjálpað liðinu í leitinni að fyrsta heimsmeistaratitlinum síðan árið 1966.