Ingvar Smári Birgisson lögmaður og fulltrúi Sjálfstæðisflokksins í stjórn RÚV og Andrea Sigurðardóttir blaðamaður á Morgunblaðinu mótmæla harðlega þeim orðum Jóns Gnarr, þingmanns Viðreisnar, að fréttaflutningur blaðsins af greiðslum RÚV til Jóns sé afsprengi pólitísks hráskinnaleiks. Samkvæmt fréttum Morgunblaðsins fékk Jón greitt fyrir skemmtiatriði í spjallþætti Gísla Marteins Baldurssonar. Atriðið fór mjög fyrir brjóstið á andstæðingum aðildar Íslands að Evrópusambandinu og gagnrýnt var að stjórnarþingmaður stæði fyrir slíku. Ingvar spurðist fyrir á stjórnarfundi RÚV um hvort Jón hafi fengið greitt fyrir atriðið og svaraði Stefán Eiríksson útvarpsstjóri, samkvæmt fundargerð, því játandi. Jón neitaði því hins vegar alfarið að hafa fengið greitt fyrir þátttöku sína en Ingvar segir ekkert persónulegt hafa verið á bak við fyrirspurnina og hann kunni vel við Jón. Útvarpsstjóri hefur nú staðfest að Jón hafi ekki fengið greitt fyrir atriðið.
Frétt Morgunblaðsins byggði á fundargerð stjórnar RÚV, frá því í mars síðastliðnum, þar sem fram kemur að Stefán hafi svarað spurningu Ingvars um hvort Jón hafi þegið greiðslur fyrir atriðið játandi.
Jón sagði í Facebook-færslu að greinilega hafi Ingvar, sem hann nefnir þó ekki á nafn, og Morgunblaðið haft samvinnu um málið og gerði athugasemd við að blaðamaður hafi ekki haft samband við hann við vinnslu fréttarinnar. Vildi hann meina að það væru eðlileg vinnubrögð blaðamanna. Um hafi verið að ræða pólitískan hráskinnaleik og óvönduð vinnubrögð af hálfu blaðamanns
Þótt Jón nefni ekki Andreu sem blaðamanninn sem skrifaði fréttina þá segir hún í Facebook-pistli þingmanninn saka hana að ósekju um að taka þátt í pólitískum hráskinnaleik með því að skrifa fréttina.
Andrea lætur þess þó ekki getið að hún er virkur þátttakandi í starfi Sjálfstæðisflokksins og hefur marg sinnis í færslum á samfélagsmiðlum gagnrýnt stefnu og störf ríkisstjórnarinnar og þeirra flokka sem að henni standa.
Andrea segir það eðlileg vinnubrögð að byggja frétt á fundargerð stjórnar opinbers félags eins og RÚV sé. Raunar hafi Morgunblaðið marg sinnis reynt að ná sambandi við Jón vegna fréttarinnar en hann ekki svarað símtölum:
„Jón Gnarr valdi, eftir drjúga umhugsun að skjóta sendiboðann, að grafa undan starfsheiðri mínum fyrir að segja frétt af honum, sem byggði á ábyggilegri og opinberri heimild og vísað var í með beinum hætti.“
Ingvar deilir færslu Andreu og segir:
„Það er magnað hvernig Jón Gnarr fór strax í einhverjar samsæriskenningar um samstarf Moggans við mig.“
Ingvar vitnar í orð Jóns um að vegið hafi verið að starfsheiðri hans en segir að ekkert persónulegt hafi verið á bak við fyrirspurnina um hvort Jón hafi fengið greitt fyrir atriðið. Vel geti verið að Jón hafi aldrei sent reikning vegna atriðisins í þætti Gísla Marteins en miðað við svör útvarpsstjóra hafi staðið til að greiða þingmanninum fyrir þátttöku sína:
„Jón stillir þessu einnig upp eins og það sé vegið að starfsheiðri hans með þessari umfjöllun. Það er ekkert persónulegt bakvið þessa umfjöllun eða fyrirspurn mína. Ég kann ágætlega við Jón og get reyndar upplýst um hér að ég kaus hann í síðustu forsetakosningum. Þessi umfjöllun snýst um fjölmiðla og hvað sé eðlilegt að ríkisfjölmiðill gerir í ljósi hlutlægnisskyldu sinnar.“
Stefán Eiríksson útvarpsstjóri hefur staðfest við Vísi að enginn reikningur hafi borist RÚV frá Jóni vegna atriðisins og því hafi hann ekki fengið greitt fyrir það.
