Jóhann Skúli Jónsson, gjarnan kallaður Jói Skúli, var gestur Helga Fannars í nýjasta þætti af Íþróttavikunni og með þeim var einnig Hörður Snævar Jónsson.

Viðtal sem Jóhann Skúli Jónsson tók við Simon Tibbling, lykilmann Fram sem sló í gegn á síðustu leiktíð, barst í tal í þættinum. Hann sagði eitt sem erlendir leikmenn þyrftu að venjast áður en þeir koma til Íslands.

„Ég tók viðtal við Simon Tibbling um daginn. Af því hann þekkir John Guidetti þá var ég að spyrja hann út í möguleikann á að hann hefði komið,“ rifjaði Jóhann upp, en Guidetti var á mála hjá Manchester City í mörg ár, þó hann hafi aðeins spilað einn keppnisleik fyrir aðalliðið. Þá spilaði hann fyrir leið eins og Feyenoord og Celta Vigo. Tibbling átti sömuleiðis góðan feril erlendis áður en hann kom hingað.

„Hann fór að tala um hvað væri skrýtið að spila hérna, þú þyrftir að aðlaga því að ákveðnum hlutum og eitt stærsta sem hann nefndi var að það væri alltaf bara geggjað mikill vindur þegar við erum að spila hérna: „Ég er ekkert vanur þessu og þarf að læra á þetta.“ Maður pælir ekki nógu mikið í þessu því maður er bara vanur því að það sé bara endalaus vindur.“

Nánar í spilaranum.