Viðtalið sem um ræðir birtist í lokaþætti heimildarþáttaraðar NBC Peacock, The Gilgo Beach Killer – House of Secrets, sem sýndur verður vestan hafs á fimmtudag. Fyrri þrír þættirnir voru sýndir í fyrrasumar en fjórði þátturinn bættist við eftir að Rex játaði morðin á sig fyrr í þessum mánuði.
Í viðtalinu lýsir Ása því þegar eiginmaður hennar felldi grímuna og játaði morðin. Ekki liggur fyrir hvenær þetta átakanlega uppgjör fór fram, en fram hefur komið að Ása hafi sótt um skilnað eftir 27 ára hjónaband þeirra nokkrum dögum eftir að hann var handtekinn í júlí 2023.
„Hann virtist mjög taugaóstyrkur – mjög, mjög taugaóstyrkur,“ sagði hún lögmanni sínum í brotinu úr væntanlegum þætti.
Þá kemur fram að í gegnum samtalið, sem fram fór augliti til auglitis, hafi hún ávarpaði hann sem Herra Heuermann eins og til að skapa fjarlægð frá því að hann væri eiginmaður hennar.
„Ég sagði við hann: „Herra Heuermann, mér skilst að þú sért að játa þessi morð fyrir mér?“ segir hún. „Geturðu sagt mér hversu margar þessara kvenna þú drapst?” Hann sagði átta.“
Ása segir að Rex hafi tjáð henni að morðin hefðu verið framin þegar hún var ekki heima.
Lögmaður hennar, Bob Macedonio, spyr hana síðan hvort einhver fórnarlambanna hafi verið myrt á heimili þeirra í Massapequa Park á Long Island. „Hann sagði já, þær voru myrtar í herberginu hans niðri, allar nema ein,“ segir hún.
Þegar hún var spurð hvort hann hefði hikað við að svara spurningunum svaraði hún: „Nei – hann sagði mér einfaldlega svörin.“
Játning Rex var, að sögn, jafn köld og úthugsuð og glæpirnir sjálfir. Hann lýsti því með yfirveguðum hætti hvernig hann beið eftir að eiginkona hans færi að heiman áður en hann breytti fjölskylduheimilinu í vettvang morða.
Ása segir að hún hafi á einum tímapunkti neyðst til að loka á eigin tilfinningar til að geta hlustað á frásögn mannsins sem hún hafði búið með í nær þrjá áratugi. „Ég setti upp vegg,“ segir hún meðal annars en brotið úr þættinum má sjá hér að neðan:
View this post on Instagram
