Vonir ensku úrvalsdeildarinnar um að fá fimm sæti í Meistaradeild Evrópu á næstu leiktíð fengu áfall á miðvikudagskvöld eftir slæman árangur enskra liða í Evrópukeppnum.

Samkvæmt nýju fyrirkomulagi UEFA fá tvær þjóðir sem standa sig best í Meistaradeildinni, Evrópudeildinni og Sambandsdeildinni svokölluð „European Performance Spots“ (EPS). Það þýðir að þær deildir fá eitt aukasæti í Meistaradeildinni. Þetta sást til dæmis á síðustu leiktíð þegar Newcastle endaði í fimmta sæti en komst samt í Meistaradeildina.

Sætin ráðast af samanlögðum stuðlum liða hverrar deildar í Evrópukeppnum. Stigafjöldanum er síðan deilt niður á fjölda liða frá hverju landi sem taka þátt.

Enska úrvalsdeildin er enn í efsta sæti stuðlatöflunnar með 22,513 stig að meðaltali, um 4,5 stigum meira en Spánn sem er í öðru sæti með 18,031 stig. Þýskaland er skammt á eftir með 18,000 stig.

Þrátt fyrir það var vikan erfið fyrir ensk lið. Manchester City tapaði 3-0 fyrir Real Madrid, Chelsea beið 5-2 tap gegn PSG og Arsenal gerði 1-1 jafntefli við Bayer Leverkusen. Tottenham tapaði einnig 5-2 fyrir Atlético Madrid, Liverpool tapaði 1-0 fyrir Galatasaray og Newcastle gerði 1-1 jafntefli við Barcelona.

Sigur í Evrópukeppnum gefur tvö stig í stuðulinn og jafntefli eitt stig, auk bónusstiga fyrir að komast áfram í útsláttarkeppninni.

Manchester United, Liverpool, Chelsea og Aston Villa berjast um sæti þrjú til fimm í deildinni um þessar mundir.

Enska deildin er enn í góðri stöðu, en ef ensk lið detta út á næstu stigum gæti baráttan um aukasætið orðið mun jafnari á lokasprettinum.