Síðan árið 2018 hafa forsætisráðuneytið og undirstofnanir þess eytt á annað hundrað milljónum króna í starfslokasamninga. Megnið af fénu hefur farið í starfslokasamninga hjá Seðlabankanum.
Þetta kemur fram í skriflegu svari Kristrúnar Frostadóttur forsætisráðherra við fyrirspurn Karls Gauta Hjaltasonar þingmanns Miðflokksins.
Segir í svarinu að á tímabilinu hafi forsætisráðuneytið sjálft gert þrjá starfslokasamninga sem feli í sér réttindi umfram það sem kveðið sé á um í lögum um réttindi og skyldur starfsmanna ríkisins. Einn árið 2023 og tvo árið 2025. Kostnaðurinn umfram áfallinn uppsagnarfrest var um 10 milljónir króna.
Seðlabankinn gerði á tímabilinu 19 starfslokasamninga. Sjö árið 2020, þrjá árið 2023 og fjóra árið 2025 en einn á hverju þeim ára sem eftir standa. Þessir samningar fólu í sér greiðslur umfram réttindi viðkomandi starfsmanna samkvæmt lögum um réttindi og skyldur starfsmanna ríkisins og kjarasamningum.
Heildarkostnaður bankans vegna þessara 19 starfslokasamninga var 161.641.373 krónur. Mestur var hann árið 2020, 79.666.509 króna. Starfslokasamningarnir fjórir árið 2025 kostuðu bankann 27.763.195 krónur en þeir þrír sem gerðir voru 2023 kostuðu 20.475.825 krónur. Athygli vekur að eini starfslokasamningurinn sem bankinn gerði 2022 kostaði hann um 13,8 milljónir króna og sá eini frá 2024 kostaði 14,7 milljónir.
Þessi fjöldi starfslokasamningar hjá Seðlabankanum á umræddu tímabili er í svari forsætisráðherra einkum skýrður með því að í kjölfar lagabreytinga hafi í ársbyrjun árið 2020 Fjármálaeftirlitið verið lagt niður og sameinað Seðlabankanum og eftirlit með allri fjármálastarfsemi verið eftir það hjá bankanum. Seðlabankinn hafi þar af leiðandi tekið við réttindum og skyldum starfsfólks Fjármálaeftirlitsins. Aukinn fjölda samninga frá árinu 2020 megi því rekja til sameiningarinnar. Vegna lagabreytinganna hafi átt sér stað miklar breytingar á stjórnskipan bankans sem leitt hafi til þess að störfum í yfirstjórn var fækkað í janúar 2020. Enn fremur hafi skipulagsbreytingar átt sér stað á árunum 2021–2025 til að samþætta starfsemina enn frekar og ná fram markmiðum með sameiningunni.
Fyrir utan Seðlabankann er Hagstofa Íslands eina undirstofnun forsætisráðuneytisins sem gert hefur starfslokasamninga frá 2018. Um er að ræða einn samning sem gerður var árið 2022 en hinn árið 2023. Kostnaður við fyrri samninginn var 3.971.399 krónur en þann seinni 3.851.025 krónur.
Alls hafa því forsætisráðuneytið og þessar tvær undirstofnanir þess eytt 179.463.797 krónum í starfslokasamninga frá árinu 2018 en 90,1 prósent af upphæðinni fór í starfslokasamningana hjá Seðlabankanum.
