Fyrrum enski landsliðsmaðurinn Darren Bent er á því máli að Chelsea eigi að reyna að fá hinn 41 árs gamla Thiago Silva aftur til baka á næsta ári.

Silva er hafsent og spilar í dag í heimalandi sínu Brasilíu en hann er mjög vel metinn á meðal stuðningsmanna enska liðsins.

Chelsea hefur ekki verið sannfærandi varnarlega á tímabilinu og eru líkur á að einhver verði keyptur í næsta glugga.

Bent telur að Silva myndi hjálpa Chelsea þrátt fyrir aldurinn en fjölskylda hans býr í London í dag og spilar sonur hans fyrir yngri lið félagsins.

Silva hefur staðfest það að hann sé að kveðja Fluminense og er talið að hann vilji fara aftur til Englands.

,,Ef ég væri hjá Chelsea í dag þá myndi ég reyna að fá hann aftur inn og ef það er til að spila þá er það til að spila,“ sagði Bent.

,,Ég horfði á hann spila fyrir Fluminense á HM félagsliða og hann leit mjög vel út. Auðvitað er hann ekki jafn hraður því hann er kominn á aldur en hann hugsar hratt.“