Samþykkt hefur verið í umhverfis- og framkvæmdaráði Hafnarfjarðar að fela veitustjóra bæjarins að semja við Garðabæ um að síðarnefnda sveitarfélagið borgi meira fyrir áframhaldandi afnot af fráveitukerfi þess síðarnefnda. Segja bæjarfulltúar ekki ganga lengur að íbúar Hafnarfjarðar borgi hærra verð fyrir afnot af fráveitunni en raunin hefur verið með Garðbæinga.
Samfylkingin lagði fram tillögu þessa efnis á síðasta fundi bæjarstjórnar við umræðu um fjárhagsáætlun. Lagt var til að bæjarstjórn Hafnarfjarðar samþykkti að þjónustugjöld/tekjur vegna fráveitu hækkuðu um 60 milljónir króna vegna endurskoðaðs þjónustusamnings bæjarins við Garðabæ um móttöku frárennslis.
Í greinargerð með tillögunni kom fram fyrir liggi að fráveitukerfi Hafnarfjarðarbæjar taki við umtalsverðu magni frárennslis frá Garðabæ. Samningur bæjarfélaganna um það kveði á um árlega greiðslu frá Garðabæ til Hafnarfjarðar að upphæð 12,5 milljónir króna. Sá samningur sé fyrir nokkru runninn út, en nýtt bráðabirgðasamkomulag aðila hafi verið gert í ágúst síðastliðnum og þá hafi þjónustugjaldið tvöfaldast og sé nú rúmar 2 miljónir á mánuði eða um 27 milljónir á ársgrundvelli.
Er því greinilega lagt til að gjaldið verði tvöfaldað í annað sinn.
Segir síðan í greinargerðinni að verkfræðistofan Efla hafi tekið saman skýrslu um málið, sem og stöðu og framtíðarverkefni fráveitumála í Hafnarfirði. Ljóst sé að miðað við magn frárennslis frá hverfum í Garðabæ, íbúðabyggð í Urriðaholti og atvinnu- og þjónustusvæðum þar í bæ, um lagnakerfi Hafnarfjarðar þá ætti það að skila mun hærri upphæðum í þjónustugjald til Hafnarfjarðarbæjar, ef tekið sé mið af gjaldtöku samkvæmt holræsagjaldi gagnvart íbúum Hafnarfjarðarbæjar.
Segir enn fremur í greinargerðinni að einnig sé eðlilegt að þessi þjónusta verði verðlögð þannig að ráð sé gert fyrir fjárfestingarkostnaði Hafnarfjarðar fyrr og nú og í framtíð, en ekki eingöngu rekstri kerfisins. Á yfirstandandi ári verji Hafnarfjarðarbæ 725 milljónum króna til verklegra framkvæmda við holræsamál og að jafnaði 800 milljónum á ári á næstu þremur árum. Eðlilegt sé að gjaldtaka vegna nýtingar Garðabæjar taki mið af þessum kostnaði og sé þá ótalinn kostnaður fyrri ára við lagnakerfi og hreinsistöðvar, sem Hafnarfjarðarbær hafi alfarið staðið straum af.
Er síðan áréttað að Garðabær hafi á liðnum árum fengið útsöluverð á þessari þjónustu og greitt lægra gjald en þjónustunotendur í Hafnarfirði. Samstarf sveitarfélaga sé af hinu góða og jákvætt en það sé sanngirnismál að það sé til hagsbóta fyrir báða aðila og þá beri að greiða sanngjarnt eftirgjald. Ljóst sé að Garðabær hafi undirbúið árum saman stóra og kostnaðarsama framkvæmd við eigið lagnakerfi en frestað því og sparað fjármagn á meðan Hafnarfjörður hafi sinnt þjónustunni og fjárfestingu í þessum innviðum fyrir lágt þjónustuverð. Sé morgunljóst að greiðslur Garðabæjar vegna þessarar þjónustu séu langt undir eðlilegum viðmiðunarmörkum og því gert ráð fyrir að tekjuauki fráveitunnar vegna nýs og endurskoðaðs samnings verði um 60 milljónir króna á komandi ári.
Samfylkingin er í minnihluta í bæjarstjórn en meirihluti Framsóknarflokksins og Sjálfstæðisflokksins vísaði tillögunni til umhverfis- og framkvæmdaráðs sem fundaði fyrr í vikunni. Niðurstaða þess var að fela veitustjóra að halda áfram viðræðum við Garðabæ vegna samnings um fráveitu og móttöku frárennslis frá Garðabæ og að leggja fram tillögu um hækkun á samningnum á næsta fundi ráðsins. Hvort að gjaldið verði tvöfaldað á nýjan lei eins og bæjarfulltrúar Samfylkingarinnar lögðu til á væntanlega eftir að koma í ljós.
