Stefán Pálsson, sagnfræðingur og knattspyrnuáhugamaður með meiru, var gestur Helga Fannars Sigurðssonar í nýjasta þætti af Íþróttavikunni á 433.is.

Mohamed Salah hefur verið á allra vörum síðustu daga eftir að hann hraunaði yfir Arne Slot og Liverpool eftir bekkjarsetu þrjá leiki í röð. Hann var í kjölfarið settur utan hóps í Meistaradeildarleik gegn Inter.

„Þetta slær mann eins og það sé verið að koma af stað einhverri atburðarás sem leiðir til þess að hann losi sig og fari í einhvern risasamning í Mið-Austurlöndum. Ég held að menn átti sig ekki á hvað það yrði stórt ef eitthvað félag þar nær í hann, það yrði að mörgu leyti stærra eða á pari við Ronaldo í Sádí,“ sagði Stefán meðal annars um málið, en Salah hefur lengi verið orðaður við Sádí.

„Ég á rosalega bágt með að sjá að Mo Salah, kominn á sinn aldur og augljóslega farinn að fara aðeins niður brekkuna aftur, að hann sjái fyrir sér sem eitthvað end-game í þessu leikriti að stjórinn verði rekinn og hann fái nýjan. Ég kaupi það ekki.“

Helgi spurði hvort ekki mætti fullyrða að Salah þoldi mótlæti illa. Hann reifst við Jurgen Klopp eitt sinn er hann tók hann út af í leik.

„Hann er ekkert sérstaklega taktískur og ekki vanur því að þurfa að nota mikla diplómasíu til að koma sínu áfram og halda sínu nafni á lofti. Svo virðist hreinlega vera að ef hann á ekki skap við sína yfirmenn þá fer allt til fjandans. En maður er auðvitað bara að reyna að lesa í eitthvað sem maður sér úr fjarska,“ sagði Stefán þá.

Þátturinn í heild er í spilaranum.