Veðbankar segja líklegast að Jurgen Klopp verði næsti stjóri Real Madrid, nú þegar sæti Xabi Alonso er farið að hitna verulega.

Real Madrid hefur gengið illa undanfarið og hjálpar ekki til að margar af stjörnum liðsins eru sagðar ósáttar við Alonso. Í vikunni greindu einhverjir miðlar frá því að tap gegn Manchester City myndi þýða að Spánverjinn fengi sparkið.

Það fór einmitt svo að Real Madrid tapaði leiknum gegn City í Meistaradeildinni í gær og fjalla spænskir miðlar, sem og miðlar víðar, af kappi um það hver gæti verið eftirmaður Alonso, verði hann rekinn.

Klopp, sem hefur verið án starfs síðan hann yfirgaf Liverpool í fyrra, er líklegastur með stuðulinn tvo. Þar á eftir kemur Zinedine Zidane með þrjá, en hann er sagður vera að taka við franska landsliðinu næsta sumar og því ólíklegra að hann taki við Real Madrid í þriðja sinn.

Oliver Glasner hjá Crystal Palace og Andoni Iraola hjá Bournemouth koma þar á eftir en á blaði eru einnig Roberto De Zerbi, Fabian Hurzeler, Unai Emery, Steven Gerrard og Simeone Inzaghi með hærri stuðla.