Grímur Atlason framkvæmdastjóri Geðhjálpar lýsir óánægju sinni með að Vísir og Mbl.is hafi ekki lokað fyrir athugasemdir við deilingar á Facebook-síðum sínum á fréttum um að Oktavía Hrund Guðrúnar Jóns hafi hlotið kjör sem fyrsti formaður Pírata. Oktavía er kynsegin og notast við fornafnið hán og einkennast fréttirnar af því og í athugasemdum á Facebook-síðum miðlanna hafa verið skrifaðar fjöldi rætinna og hatursfullra athugasemda í garð Oktavía og kynsegin fólks. Jakob Bjarnar Grétarson blaðamaður svarar hins vegar Grími fullum hálsi. Það sé engin ástæða fyrir þessa tvo fjölmiðla til að bregðast sérstaklega við. Hver og einn beri ábyrgð á eigin orðum og Grímur sé með þessum kröfum að grafa undan fjölmiðlum á Íslandi.
Í athugasemdum er meðal annars gerð athugasemd við að Vísir hafi skrifað að Oktavía hefði verið kjörið. Neita viðkomandi að samþykkja að Oktavía noti fornafnið hán en ekki hún. Í athugasemdunum eru orð eins og rugl og trúarbrögð notuð. Oktavía er í einni athugasemd kallað fyrirbæri, annarri karlmaður og enn annarri rugludallur, enn annarri gaur og í mörgum athugasemdum er fullyrt að um geðveiki sé að ræða. Andúðin og hatrið í garð Oktavía og kynsegin fólks virðist töluverð hjá þeim sem rita athugasemdirnarSumir virðast gera það undir eigin nöfnum en aðrir notast við falsreikninga.
Grímur Atlason skrifar, á Facebook, auk vonar sinnar um að lokað verði fyrir athugasemdir við deilingar á fréttunum:
„Þangað til að það gerist óska ég þess að vinir og vandamenn þeirra einstaklinga, sem hér tjá sig í meðfylgjandi sýnishornum, fari heim til þeirra og gefi gott knús. Það hlýtur að vera skortur á hlýju og/eða ást sem kallar fram slíka mannfyrirlitningu og illsku eins og hér birtist. Tilefnið, sem kallaði fram þessa froðufellandi heift, var kosning á milli tveggja einstaklinga í embætti formanns í stjórnmálaflokki.“
Jakob Bjarnar starfar sem blaðamaður á Vísi og er ekki ánægður með þessi orð Gríms í garð miðilsins og Mbl.is:
„Zuckerberg hlýtur að bera ábyrgð á þessu. Eða það sem meira er, hver maður hlýtur að bera ábyrgð á orðum sínum. Svona er þetta bara og þú gerir illt verra með að sópa þessum hroða undir teppi þar sem það magnast.“
Svarar Grímur með því að fjölmiðlarnir séu greinilega að deila umræddum fréttum á Facebook til að fá sem flesta smelli og magna upp umræðu af þessu tagi. Afleiðiningin sé sú að svona skoðanir verði viðteknari.
Jakob Bjarnar andmælir harðlega slíkum fullyrðingum:
„Beindu bræði þinni í réttar áttir maður og talaðu ekki af þessari vanþekkingu. Fréttum Vísis af þessu kjöri, þar sem blaðamaður lagði sig í líma við að fjalla um af ítrustu virðingu, var ekki deilt meira á Facebook en gerist og gengur. Það sem þú hins vegar ert að gera er að ýta undir upplýsingaóreiðu, ala á hatri og mola þannig undan því sem eftir stendur af blaðamennsku á Íslandi. Mannlíf stekkur svo á vagninn … til hamingju með það.“
Þar er blaðamaðurinn að vísa til fréttar Mannlífs um færslu Gríms.
Grímur segist ekki vera að rita um þetta af vanþekkingu:
„Skoðanir mínar eru þér kannski ekki að skapi en þær eru ekki tilkomnar vegna vanþekkingar. Bræði er síðan ástand sem þú verður að finna einhvern annan til að hefta við. Hvers vegna er verið að deila fréttum á Meta – er það ekki Meta sem er að ganga að fjölmiðlum dauðum af því að auglýsingapeningarnir fara í síauknum mæli þangað? Hvers vegna að fóðra skrímslið og sparka siðan í gamla vini sína fyrir að tuða yfir því?“
Sakar þá Jakob Bjarnar Grím um að ala á hatri í garð blaðamennsku og fjölmiðla á Íslandi:
„Sem elur svo á þessu óskiljanlega hatri á því sem eftir stendur af blaðamennsku á Íslandi. Þar ræður sannkölluð Þórðargleði ríkjum. Það hefur kannski farið fram hjá þér en fjölmiðlar eiga í vök að verjast? Hér eru þrjár ritstjórnir sem eru að burðast við að sinna fréttaflutningi. Sýn, Mbl og svo er það hið ríkisrekna RUV sem er meira að segja með sérstaka samfélagsmiðladeild (sic). Fjölmiðlar vilja vitaskuld að efni þeirra sé lesið. En ekki hvað?“
Ljóst er að fjölmiðlar sem sinna á fréttaflutningi á Íslandi eru fleiri en þetta en hvort stjörnublaðamaðurinn er vísvitandi að sleppa því að nefna þá er ekki ljóst en fyrir liggur að þessir þrír fjölmiðlar ráða yfir mun meira fjármagni og mannafla en aðrir á þessum markaði hér á landi. Kemur hans loks vinnuveitanda sínum til varnar:
„Vísir hefur ekki fallið í þá gryfju að notast við clickbaits ( smellubeitur innsk. DV) þó allt heiti nú clickbait í kolli þeirra beturvita sem fjálglega um fjalla. Vísir deilir hins vegar fréttum sínum á Fb. Þar er verið að slást um að bæta kannski 5-10 prósent við lesturinn. Í stað þess að finna gagnrýni þinni stað í fréttunum sjálfum þá vilt þú gera Vísi ábyrga fyrir þeim (glórulausu) athugasemdum sem þar falla. Talandi um vakningu meðal almennings þegar blaðamennska á Íslandi er annars vegar. Afsakaðu þó ég tali um óupplýstar upphrópanir. Þú ert í raun að gera þig sekan um það sem þú vilt gagnrýna.“
Ekki tók Grímur aftur til máls en Jakob Bjarnar hélt áfram að deila við aðra í athugasemdakerfinu undir færslu hins fyrrnefnda. um meðal annars smellubeitur og
