Jón Pétur Zimsen, þingmaður Sjálfstæðisflokksins og fyrrverandi skólastjóri Réttarholtsskóla, fer mikinn í hressilegu TikTok-myndbandi þar sem hann hæðist að núverandi einkunnakerfi í grunnskólum, sem hann segir vera óskiljanlegt. Hann segist vilja fá talnakerfið aftur.
„Ég er búinn að vera skólastjóri og kennari í 30 ár. Það skilur enginn þetta einkunnakerfi. Við verðum að negla þessu bókstafakerfi á haugana. Við í Sjálfstæðisflokknum viljum talnakerfið. Við viljum tölurnar aftur,“ er á meðal þess sem Jón segir í myndbandinu:
@jon.petur.zimsen Tölur eða bókstafir?
Valgarður Lyngdal Jónsson kennari rifjar hins vegar upp á Facebook-síðu sinni að Jón hafi farið jákvæðum orðum um nýtt einkunnakerfi í kynningarriti árið 2016 og lýst talnakerfinu sem takmörkuðum mælikvarða. Birtir Valgarður skjáskot úr viðtalinu við Jón og bendir á að þáverandi menntamálaráðherra hafi verið Sjálfstæðismaðurinn Illugi Gunnarsson.
Jón segir meðal annars í viðtalinu:
„Það sem skiptir mig mestu máli er það sem liggur að baki kvarðanum. Breytingin felst í því að það er verið að meta hæfni, hvernig nemandinn beitir þekkingu, ekki hversu góður hann er að þylja upp staðreyndir og muna utanbókar. Það er þetta sem ég er ánægður með.“
„Ef allir fara eftir þessu og skoða hvaða texti liggur á bak við hvern bókstaf þá held ég að matið verið miklu samræmdara en það hefur verið þar sem samræmdur texti liggur til grundvallar í hverri grein. Í gamla kerfinu, þegar skólarnir gáfu einkunnir í tölum, gat hvað sem er legið að baki hverri einkunn. Þá var ekki samræmi í því hvort inni í einkunn væri námsefni frá síðustu þremur árum eða tveimur mánuðum, ritgerð eða ekki ritgerð, ástundun og iðni o.s.frv.“
Í stuttu spjalli við DV bendir Jón Pétur á að hann hafi talað í fimm ár um að skipta út kerfinu. „Árum saman hefur verið reynt að berja þetta inn en ekkert gengið. Fáir þekkja þetta betur en ég og það þarf að horfast í augu við það sem gengur ekki upp. Hef talað um í a.m.k. fimm ár að skipta þessu út.“
Aðspurður hvort innleiðing kerfisins hafi þá ekki gengið eftir eins og hann sjá fyrir sér ári 2016 segir Jón Pétur:
„Í raun virkar kerfið ekki. Ekkert samræmi er í kerfinu þrátt fyrir tilraunir til þess. Nemendur og foreldrar skilja illa endurgjöfina úr því. Kennarar eyða alltof miklum tíma í það án þess að það skili einhverju.“
Fréttinni hefur verið breytt.
