Hin fjórtán ára gamla Jóhanna Ruth komst örugglega í úrslitaþátt Ísland Got Talent í gærkvöldi með mögnuðum flutningi á lagi Bonnie Tyler, Holding Out for a Hero.

Ánægð Jóhanna var sátt við frammistöðu sína í gærkvöldi.

Mynd: Skjáskot Stöð 2

Jóhanna flutti frá Filippseyjum til Íslands fyrir fimm árum ásamt fjölskyldu sinni. Hún þykir líkleg til afreka í keppninni í ár og hlaut hún einróma lof dómnefndar. Svo fór að Jóhanna bar sigur úr bítum í símakosningunni. Frábæran flutning Jóhönnu má sjá í spilaranum hér að neðan.

„Þú ert með rödd sem er stærri heldur en lífið. Þú ert ein besta rödd sem ég hef heyrt á Íslandi,“ sagði Ágústa Eva Erlendsdóttir sem á sæti í dómnefndinni. Dr. Gunni sagði magnað að Jóhanna væri aðeins fjórtán ára og með þessa rödd. Sagðist hann hlakka til að heyra í henni eftir nokkur ár.

Mikið lof Dómnefndin var ánægð með frammistöðu Jóhannu. Ágústa Eva sagði að hún væri með eina bestu rödd sem hún hefði heyrt á Íslandi. Ágæt meðmæli það.

Mynd: Skjáskot Stöð 2

Jakob Frímann Magnússon, sem er einnig einn dómara, hafði þetta að segja: „Maður þekkir röddina þína eins og skot og hún er mjög þroskuð og flott. Ég segi bara það er dásamlegt að Ísland skuli vera opið fyrir fólki allsstaðar að úr heiminum […] Þú átt framtíðina fyrir þér. Ég hvet fólk til að kjósa þig.“