Nýverið lauk tíundu alþjóðlegu kvikmyndahátíðinni Zeichen der Nacht í Berlin og þar hlaut O (Hringur) sérstök dómnefndarverðlaun.

„Á aðeins 20 mínútum tekst Rúnari Rúnarssyni, leikstjóra myndarinnar O (Hringur), að draga upp áleitna, strangheiðarlega og sársaukafulla mynd af manni sem hefur verið yfirbugaður af áfengisfíkn. Myndræna ákvörðunin að nota svart-hvíta filmu eykur innri óróleika aðalpersónunnar upp í óbærilegt stig; sem áhorfendur finnum við örvæntingu hans þar til síðasta flaskan er tóm. Áfengissýki sýnd án fegrunar og með dásamlega nánu handbragði, kvikmynd sem er ekki aðeins listilega sannfærandi, heldur gæti einnig nýst í forvarnarskyni,“ segir í yfirlýsingu dómnefndar.

Myndin var frumsýnd á kvikmyndahátíðinni í Feneyjum og eru þetta tuttugustu verðlaun myndarinnar sem er einnig í forvali til Óskarsverðlaunanna 2026.

O (Hringur) er ljóðræn frásögn af manni sem vill standa sig en hans helsta hindrun er hann sjálfur. Ingvar E. Sigurðsson er í aðalhlutverki, Rúnar Rúnarssonar er leikstjóri og Heather Millard framleiðandi. Myndin er í sýningum í Kringlubíói.

„Þetta mikla ævintýri heldur áfram og erum við ótrúlega þakklát og stolt af  þeim sem gerðu þessa mynd. Stærstu fréttirnar sem við bíðum eftir þessa daganna eru frá Bandaríkjunum en nefndarstörf Óskarskvikmyndaakademíunnar eru í fullum gangi þessa daganna en myndin okkar er í forvali vegna næstu Óskarsverðlauna. Annars erum við að undirbúa nýja mynd og stefnan er á tökur í byrjun næsta árs. En nánar um það síðar,“ segir Heather.