Þorgrímur Haraldsson, formaður meistaraflokksráðs kvenna hjá Fram hefur sagt starfi sínu lausu en það hefur allt ráðið gert og þjálfari liðsins einnig.

Þorgrímur segir metnaðarleysi stjórnar knattspyrnudeildar fyrir kvennafótboltanum vera þannig að fólkið vilji ekki starfa þar lengur.

Óskar Smári Haraldsson, þjálfari liðsins sagði starfi sínu lausu í gær en nú hefur allt ráðið í kringum kvennafótboltann labbað út. Fram hélt sæti sínu í Bestu deild kvenna í sumar.

„Ég hef haft þetta verkefni algjörlega á heilanum og gefið meira af mér í þetta en líklega er skynsamlegt eða hollt. En á móti hefur þetta gefið mér gríðarlega mikið. Ég hef kynnst stórum hópi af frábæru fólki. Þjálfurum, leikmönnum, sjálfboðaliðum og starfsfólki og mér þykir mjög vænt um það allt. Ég hef sömuleiðis lært mjög mikið og tel mig almennt vera mun hæfari í flestöllu tengdu þessu en ég var í upphafi,“ segir Þorgrímur í færslu á FAcebook.

„En nú er komið að leiðarlokum í þessu hlutverki hjá mér,“ segir hann.

Hann segir metnað knattspyrnudeildar ekki mikinn fyrir knattspyrnu kvenna og því hafi hann látið af störfum og sama sé að segja um aðra.

„Ég vil síður eyða of miklu púðri í það sem er neikvætt en ég get þó sagt það að áhugi minn á verkefninu hafði ekki dofnað neitt og mig langaði ekkert til að hætta. Ég tel hinsvegar viðhorf og metnað stjórnar knattspyrnudeildar Fram gagnvart kvennaliðinu sínu ekki samræmast mínum eigin viðhorfum og metnaði. Þeirri skoðun deili ég með meistaraflokksráði og þjálfara liðsins svo við teljum okkur ekki hafa neinn annan kost en að víkja öll frá þessu. Vonandi verður þessi ákvörðun okkar til þess að félagið bæti það sem við teljum vanta upp á og vonandi getur nýtt ráð og þjálfarateymi farið með þetta verkefni enn lengra og hærra.“