Franska leikkonan og fyrrum kynbomban Brigitte Bardot sá sig tilneydda til að skrifa færslu á X og hrekja sögusagnir um að hún væri látin.

Samkvæmt The Daily Mail kemur tilkynning Bardot eftir að Aqababe, 27 ára, sem í raun heitir Aniss Zitouni, sagði í færslu (sem síðar var eytt) að Bardot væri látin.

Bardot svaraði í færslu á frönsku á X, miðvikudaginn 22. október: „Ég veit ekki hver fávitinn er sem byrjaði þessar „falsfréttir“ um andlát mitt en ég veit að mér líður vel og ég hef engar áætlanir um að deyja strax.“

Yfirlýsing Bardot kemur næstum viku eftir að franska dagblaðið Var-Matin greindi frá því að leikkonan, 91 árs, hefði verið lögð inn á sjúkrahús í Toulon í Frakklandi í næstum þrjár vikur.

Fréttamiðillinn greindi frá því að Aqababe hefði sagt í færslu sinni að þau hefðu „einkaupplýsingar“ um meint andlát Bardot.

„Kista hennar var pöntuð í Saint-Paul-de-Jarrat í sýslunni 09 (Ariège). Goðsögn er látin og skilur eftir sig ógleymanlega arfleifð og eilíf spor í hjörtum Frakka,“ stóð í færslunni.

Þrátt fyrir svar Bardot við andlátssögusögninni stendur Aqababe við upprunalega yfirlýsingu sína og heldur því fram að það sé ekki Bardot sjálf sem er á bak við aðgang hennar á X.

„Ég eyddi einkatístinu mínu um andlát Brigitte Bardot. Það er ekki hún sem stjórnar Twitter-síðu hennar, þið munið sjá það þegar AFP tilkynnir formlega andlátið,“ segir í færslu Aqababe á frönsku á X.

Miðillinn Var-Martin greindi frá því 16. október að Bardot hefði gengist undir aðgerð á einkareknu sjúkrahúsi „sem hluta af alvarlegum veikindum“. Föstudaginn 17. október greindi fulltrúi Bardot í yfirlýsingu til frönsku fréttastofunnar AFP að minniháttar aðgerð Bardot hefði gengið vel.

Bardot þakkaði starfsfólki og skurðlækningateymi á einkasjúkrahúsinu Saint-Jean í Toulon í yfirlýsingunni og sagði að hún væri að hvíla sig heima.