„Það er spenna í mönnum. Við ætlum að vera tilbúnir í að sækja þessi þrjú stig,“ segir landsliðsmaðurinn Þórir Jóhann Helgason um leik morgundagsins við Úkraínu.

Liðin eigast við í undankeppni HM og er mikil eftirvænting. Það er uppselt á Laugardalsvöll á þennan leik, sem og leikinn við Frakka eftir helgi, í kjölfar þess að Strákarnir okkar áttu góðan landsleikjaglugga í síðasta mánuði.

Þórir segir strákana í liðinu finna fyrir því að það sé meðbyr. „Við gerum það, það er uppselt á báða leiki sem er geggjað. Það er alltaf gaman að fá stuðning frá þjóðinni og erfitt að topp það að spila fyrir framan fullan Laugardalsvöll,“ segir hann.

Jafnframt megi búast við erfiðum leik á morgun, þar sem Ísland ætlar sér þó sigur og þar með að koma sér í frábæra stöðu í undanriðlinum. „Þeir eru með marga mjög góða leikmenn í stórum liðum. Þetta verður hörkuleikur, snýst um að gefa sig allan í leikinn og vinna sín einvígi.“

Nánar er rætt við Þóri í spilaranum.