Sameiningarviðræðum milli Háskólans á Akureyri og Háskólans á Bifröst hefur verið slitið. Þetta kemur fram í tölvupósti sem Margrét Jónsdóttir Njarðvík, rektor Bifrastar, sendi nemendum nú fyrir stundu en þar kemur fram að háskólaráð HA hafi ákveðið að slaufa viðræðunum.
Viðræðurnar voru settar í gang í byrjun árs 2024 eftir í kjölfar fýsileikagreiningar á mögulegri sameiningu. Sitt sýndist hverjum um þessar hugmyndir og hafa þær víða verið gagnrýndar.
„Frá því fýsileikaskýrsla um mögulega sameiningu var birt í janúar 2024 hafa viðræðurnar verið undir innri og ytri þrýstingi sem gerði báðum háskólum erfitt um vik. Skilyrði til háskólasameiningar hafa af þeim sökum ekki verið sem ákjósanlegust. Nú er ljóst að háskólaráð HA hefur ákveðið að slíta sameiningarviðræðum. Þó þessi sameining hafi ekki gengið eftir munum við hjá Háskólanum á Bifröst áfram leggja okkar af mörkum til einföldunar, eflingar og styrkingar á háskólaumhverfi á Íslandi,“ segir í skeyti rektors.
Segist hún fullviss um að vinnan við sameiningarviðræðurnar muni nýtast skólanum vel í stefnumótun í nánustu framtíð.
