Lögreglan á höfuðborgarsvæðinu varar við svikapósti sem sendur hefur verið á fólk og látinn líta út fyrir að koma frá Skattinum. En í póstinum er hlekkur sem beinir fólki inn á rafræn skilríki.

„Lögreglan á höfuðborgarsvæðinu varar við tölvupósti netþrjóta, sem nú eru að senda út í nafni Ríkisskattstjóra. Hér er um svik að ræða, en með póstinum er verið að reyna að færa fólk inn á hlekk sem er til að opna rafræn skilríki. Við vörum við þessum pósti, en hann á að fara sömu leið og allir aðrir svikapóstar – eða beinustu leið í ruslið,“ segir í tilkynningu lögreglunnar.

Hvetur lögreglan fólk til að vera athugult og kynna sér ávallt tölvupóstfang sendanda. Í þessu tilviki er sendandi netfangið noreply@smartijcc.com sem er með öllu ótengt Skattinum. Önnur heimasíða en island.is birtist sé ýtt á hlekkinn. Þá er heimilisfang Skattsins í póstinum einnig rangt.