Sjálfstæðismenn gagnrýndu á fundi borgarráðs Reykjavíkur í gær enn á ný greiðslufyrirkomulag þess fjár sem borgin fær greitt fyrir sölu á Perlunni til Perlunnar þróunarfélags ehf. Minna þeir á að samningurinn kveði á um seljendalán af hálfu borgarinnar á mun hagstæðari kjörum en almennt bjóðist á markaði og borginni sjálfri bjóðist. Vilja þeir einnig meina að söluhagnaðurinn verði allur bókfærður í ár þótt kaupverðið eigi að greiða í 13 greiðslum fram til 2039. Fullyrða þeir að borgin hafi í raun selt Perluna með verulegum afslætti.
Salan var samþykkt í borgarráði í síðasta mánuði en eins og DV greindi frá kveður samningurinn á um 13 árlegar greiðslur fram til 2039, en þó að undanskildum árunum 2028 og 2029, þegar kaupverðið á að vera að fullu greitt.
Kaupverðið var 3,5 milljarðar króna og var um helmingur, rétt yfir 1,7 milljarði króna, greiddur 1. júní síðastliðinn.
Á fundi borgarráðs var lögð fram tillaga borgarstjóra, Heiðu Bjargar Hilmisdóttur, um viðauka við fjárhagsáætlun. Einn af þessum viðaukum kveður á um að fjárheimildir eignaskrifstofu borgarinnar verði lækkaðar um 1.628.000.000 krónur. Í tillögunni segir að þetta sé tilkomið vegna endurmats á söluhagnaði eigna og í greinargerð er vísað til sölunnar á Perlunni. Þar segir að kaupverðið sé 3.5 milljarðar króna og áætlaður söluhagnaður sem bókfærður verði árið 2025 nemi áðurnefndri upphæð, sem fjárheimildir eignaskrifstofu lækka um.
Það stendur ekki berum orðum í greinargerðinni að ekki sé gert ráð fyrir frekari söluhagnaði af sölunni en í bókun fulltrúa Sjálfstæðisflokksins segir að vakin sé athygli á því að söluhagnaður vegna Perlunnar verði að fullu bókfærður á árinu 2025, jafnvel þó greiðslur berist ekki að fullu fyrr en árið 2039.
Það er í raun vart annað hægt en að skilja orðalagið í greinargerðinni með þessum hætti enda segir þar „áætlaður söluhagnaður“ og engin sundurgreining gerð á honum eftir því 14 ára tímabili sem greiða á kaupverðið á.
Líf Magneudóttir formaður borgarráðs segir þó ekki svo vera. Hún segir í samtali við Mbl.is að ekki hafi allur söluhagnaðurinn verið bókfærður í einu. Eftir standi 300 milljónir króna sem hafi verið teknar frá í kaupsamningnum vegna viðhalds á Perlunni.
Sjálfstæðismenn gagnrýna einnig að greiðslufyrirkomulagið sé með þeim hætti að um sé að ræða seljendalán á kjörum sem eigi sér enga hliðstæðu á markaði. Kaupsamningurinn kveður eins og áður kom fram á um að rúmur helmingur kaupverðisins verði greiddur 1. júní í ár, sem var væntanlega gert, og næsta greiðsla, á næsta ári, verði 500 milljónir, þriðja greiðslan, árið 2027, verði 250 milljónir. Síðustu 10 greiðslurnar verða síðan 100 milljónir hver og greiðast ár hvert, fyrir utan árin 2028 og 2029, sú síðasta 2039.
Í samningnum er ekki kveðið á um nein viðbótarkjör á fyrstu tveimur greiðslunum, þeim stærstu, en síðustu 11 eru bundar byggingarvísitölu. Síðustu 10 greiðslunar bera síðan samkvæmt samningnum 4 prósent ársvexti frá 1. júní 2027 til greiðsludags.
Sjálfstæðismenn segja í sinni bókun að þessi kjör eigi sér enga hliðstæðu á markaði. Sérstaklega megi velta því fyrir sér hvers vegna ekki hafi verið gerð krafa um hærri upphafsgreiðslu miðað við þau fjármögnunarhlutföll sem almennt standi til boða við fasteignakaup.
Við lauslega könnun á þeim kjörum sem viðskiptabankar bjóða fyrirtækjum við fasteignakaup má sjá meðal annars að Landsbankinn býður 10,80 prósent óverðtryggða ársvexti og 6,20 prósent verðtryggða. Íslandsbanki segir á sinni vefsíðu að boðið sé upp á slíka fjármögnun með skuldabréfalánum en samkvæmt vaxtatöflu eru verðtryggðu vextirnir 10,40 prósent og þeir óverðtryggðu 6,50 prósent. Samkvæmt vaxtatöflu Arionbanka eru óverðtryggðir vextir á skuldabréfalánum til fyrirtækja 10,35 prósent en verðtryggðir 6,45 prósent.
Ljóst er því að vaxtakjörin á síðustu 10 greiðslunum sem borgin fær frá Perlunni þróunarfélagi, samtals 1 milljarður króna að nafnvirði, er mun hagstæðari en viðskiptabankar á landinu bjóða almennt fyrirtækjum sem hyggja á fasteignakaup. Bankarnir bjóða þó lengri greiðslutíma, allt að 25 ár en þó rukka þeir fyrirtæki almennt einu sinni í mánuði en ekki einu sinni á ári eins og borgin gerir í þessu tilfelli. Bankarnir bjóða fyrirtækjunum lán fyrir allt að 70-75 prósent af kaupunum sem er hærra hlutfall en borgin er að veita með seljendaláninu en það verður að meta í ljósi hagstæðari vaxtakjara.
Líf Magneudóttir segir hins vegar í samtalinu við Mbl.is að dæmi séu um svo hagstæð kjör á markaði, til að mynda hafi fasteignafélög fjármagnað sig með skuldabréfaútboðum á fjögur prósent vöxtum.
Í bókun Sjálfstæðismanna segir einnig að miðað við fjármögnunarkjör Reykjavíkurborgar megi halda því fram að í reynd sé um verulegan afslátt af kaupverðinu að ræða.
Í síðasta skuldabréfaútboði borgarinnar, sem fram fór í síðasta mánuði, voru boðnir út tveir skuldabréfaflokkar. Annar sem er óverðtryggður var boðinn út á 6,72 prósent vöxtum, til ársins 2035 með afborgunum tvisvar á ári. Heildarstærð flokksins var um 33,6 milljarðar króna. Tekið var tilboðum í um 4,9 milljarða króna á ávöxtunarkröfunni 8,40 prósent.
Hinn skuldabréfaflokkurinn var verðtryggður og boðinn út á 3,75 prósenta vöxtum með jöfnum greiðslum á sex mánaða fresti með lokagjalddaga 2044. Heildarstærð flokksins fyrir þetta útboð nam alls um 9 milljörðum króna. Heildartilboð voru 300 milljónir króna á ávöxtunarkröfunni 3,89 til 3,99 prósent. Ákveðið var að hafna öllum tilboðunum.
Ljóst er því að Reykjavíkurborg sjálfri bjóðast um þessar mundir ekki jafn hagstæð kjör á lánamörkuðum og hún veitti í samningnum um sölu á Perlunni.
