Enok Vatnar Jónsson, sjómaður með meiru, segir að fröllu-hneykslið svokallaða sé stormur í vatnsglasi og að allt sé í góðu milli hans og barnsmóður hans, Birgittu Lífar Björnsdóttur. Hann útilokar þó ekki að vinkonur hennar séu vesenið í öllum þessum stormi. Þetta kemur fram í stuttu viðtali við Enok í hlaðvarpsþættinum Götustrákar.

Eins og alþjóð veit varð allt vitlaust í samfélagi áhrifavalda um síðastliðna helgi þegar Enok virtist gera lítið úr Birgittu Líf með kuldalegri athugasemd á samfélagsmiðlinum TikTok. Enok og Birgitta Líf voru saman í þrjú ár og eignuðust saman dreng en upp úr sambandinu slitnaði fyrr á þessu ári.

Ástrós Traustadóttir, vinkona Birgittu Lífar, birti myndskeið á TikTok-reikningi sínum þar Birgitta Líf geislar og gefur í skyn að hún sé spennt fyrir framtíðinni sem einhleyp kona. Enok setti athugasemd við myndskeiðið sem hljóðaði svo: „Settu franskarnar í pokann“.

Um er að ræða slangur sem notað er til þess að niðurlægja einhvern og koma honum niður á jörðina, jafnvel gefa í skyn að viðkomandi ætti að fá sér alvöru vinnu. Athugasemdin féll í grýttan jarðveg hjá netverjum sem létu Enok heyra það og þá hafa vinkonur Birgittu Lífar einnig skotið á kappann.

Í viðtalinu við Götustrákar er Enok spurður að því hvort hann sjái eftir athugasemdinni en hann er snöggur til svars: „Ég sé ekki eftir neinu“. Hann útskýrir svo frekar að það séu aðallega netverjar sem hafi blásið upp hneykslið. Undir yfirborðinu sé allt með kyrrum kjörum.

„Staðan er nefnilega sú að ég og Birgitta erum góð sko,, við erum bara best í heimi sko. Það fyndna er að fólkið utan við þetta er að missa sig yfir þessu,“ útskýrir Enok.

Hann er síðan spurður hvort að það séu vinkonur Birgittu Lífar sem séu vesenið í öllu málinu og hvort að þær séu á móti honum. Enok slær það ekki út af borðinu: „Ja, það hlýtur að vera maður“.