Beiðni um nauðungarsölu á einbýlishúsi Árna Johnsen í Breiðholti verður tekin fyrir á skrifstofu sýslumannsins í Kópavogi þann 6. apríl næstkomandi. Þetta kemur fram í auglýsingu sem birtist í Lögbirtingablaðinu. Gerðarbeiðendur eru A- og B-deildir Lífeyrissjóðs starfsmanna ríkisins og eru fjárhæðir krafnanna rúmlega 20 milljónir króna.
Í samtali við DV segir Árni að um misskilning sé að ræða.
„Ég hef bara ekki heyrt um þetta og ég veit ekki til þess að það séu nein vandamál þar,“ segir Árni og kveðst hafa gert upp við kröfuhafana.
Hús Árna stendur við götuna Rituhóla og er um 350 fermetrar að stærð. Húsið var byggt árið 1979 og hefur Árni verið eigandi þess frá upphafi. Um miðjan febrúar síðastliðinn greindi DV frá því að Árni hefði sett húsið á sölu hjá Fasteignamarkaðinum og var ásett verð tæpar 95 milljónir króna. Þar var eignin sögð standa á „frábærum útsýnisstað við Elliðaárdalinn.“ Samkvæmt fasteignaskrá er húsið enn óselt og er ekki lengur auglýst á helstu fasteignavefjum landsins.
Þetta var ekki í fyrsta sinn sem Árni gerir tilraun til þess að selja Rituhóla. Húsið var fyrst auglýst til sölu árið 2014 en þá vakti athygli að húsið væri skráð í Fasteignaskrá um 100 fermetrum minna en það er í raun og veru. Í skránni var ekki getið til um íbúðina á neðri hæðinni. Fram kom að sonur Árna hefði búið í íbúðinni, sem væri ósamþykkt.
