Mikael Nikulásson sérfræðingur Þungavigtarinnar telur að KSÍ hafi sett vont fordæmi með því að leyfa ÍA að spila heimaleik sinn gegn KA í Akraneshöllinni í gær.

Margir eru ósáttir með það að ÍA hafi fengið það í gegn og nú telur Mikael að Þór geti farið með leik í Bogann þegar þeim hentar.

„Þetta segir mér það að Þór getur spilað í Boganum ef þeir vilja, þú getur ekki mismunað í lífinu,“ sagði Mikael í þætti gærdagsins.

Hann telur að ef Þór tapar gegn Fram í dag geti þeir bara ákveðið að fara með leikina sína í Bogann.

„Þeim kannski gengur betur inni, ef þeir tapa gegn Fram fara þeir bara inn. KSÍ er að gefa leyfi á þetta, breytir mig engu hvort það sé 3. umferð, 16. umferð eða hvað sem er.“