Matheus Cunha hefur kallað eftir því að landi hans Casemiro verði áfram hjá Manchester United í að minnsta kosti eitt tímabil til viðbótar.

Casemiro átti stórleik þegar United vann 2-1 sigur á Brentford á mánudagskvöld, skoraði fyrsta mark liðsins og var valinn maður leiksins.

Þrátt fyrir frammistöðuna er Brasilíumaðurinn enn á leið út úr félaginu þegar samningur hans rennur út í sumar. Michael Carrick staðfesti eftir leik að enn stefndi allt í brottför hans.

Cunha, sem missti af leiknum vegna meiðsla, lét þó skoðun sína skýrt í ljós á samfélagsmiðlum. Þar birti hann skilaboðin: „Eitt ár í viðbót, Casemiro“ ásamt fögnuði vegna sigursins.

Ummæli Cunha sýna að Casemiro nýtur enn mikillar virðingar innan leikmannahópsins, þrátt fyrir að félagið virðist ætla að láta hann fara.

Framtíð Brasilíumannsins verður því áfram eitt af stóru umræðuefnum sumarsins á Old Trafford.