Gianluca Rocchi, yfirmaður dómaramála í efstu deildum á Ítalíu, hefur sjálfur ákveðið að stíga tímabundið til hliðar eftir að rannsókn var hafin á meintum brotum hans.

Samkvæmt ítölskum miðlum er Rocchi til rannsóknar vegna gruns um svikula háttsemi á tímabilinu 2024–2025. Ítalska dómarasambandið staðfesti í yfirlýsingu að hann hefði stigið til hliðar á meðan málið er til meðferðar.

Einnig er Andrea Gervasoni, sem hefur umsjón með VAR í efstu deildum, farinn í leyfi vegna rannsóknarinnar.

Rocchi segir ákvörðunina tekna til að tryggja að rannsóknin gangi snurðulaust fyrir sig og segist sannfærður um að hann muni hreinsa nafn sitt.

Meðal ásakana er að hann hafi haft áhrif á val á dómara í leik Inter og einnig þrýst á VAR-dómara í leik Udinese og Parma þar sem vítaspyrna var dæmd eftir endurskoðun.

Ítölsk lög gera ráð fyrir allt að sex ára fangelsi ef sakfellt verður.