Benedikt Bóas Hinriksson, hinn þaulreyndi blaðamaður og Valsari, er ekki hrifinn af því að Stjarnan hafi látið ákvæði fylgja félagaskiptum Samúels Kára Friðjónssonar til Vals um að Reykjavíkurfélagið þyrfti að greiða háar upphæðir fyrir að láta hann spila leik liðanna í kvöld.

Valur keypti Samúel Kára á dögunum en mun að öllum líkindum ekki spila í kvöld vegna ákvæðisins. „Það er leikur sem ég vil aðallega vinna vegna framkomu Stjörnunnar gagnvart Val og Samúel Kára,“ sagði Benedikt í útvarpsþættinum Fótbolti.net á X-inu um helgina.

„Stjarnan setur inn eitthvað ákvæði, við erum að kaupa manninn á 10 milljónir plús, um að hann megi ekki spila. Af hverju?“ sagði Benedikt enn fremur.

Elvar Geir Magnússon benti þá á að upphæðin hefði verið 12 milljónir og að Valur geti vissulega spilað Samúel Kára í kvöld, með því að reiða fram fjórar milljónir króna fyrir.

„Hann má spila en Valur þarf þá að borga fjórar milljónir aukalega. Það er ákvæði um að hann megi ekki spila, við erum ekki að fara að henda fjórum milljónum í þetta,“ sagði Benedikt.

Hann hrósaði jafnframt innkomu Samúels Kára á Hlíðarenda. „Djöfulsins leiðtogi er hann. Hann kom inn með presence, talanda og fautaskap.“

Stjarnan og Valur mætast í Bestu deildinni klukkan 19:15 í kvöld á Samsungvellinum í Garðabæ. Bæði lið eru með sex stig eftir þrjá leiki.