Tottenham er að fá Kota Takai frá japanska félaginu Kawasaki, en um er að ræða efnilegan miðvörð.

Takai er aðeins tvítugur en er í lykilhlutverki hjá Kawasaki og samkvæmt Football.London mun Thomas Frank, nýr stjóri Tottenham, nota hann í aðalliðinu strax á næstu leiktíð.

Tottenham mun þá greiða 5 milljónir punda fyrir Takai, sem skrifar væntanlega undir langtímasamning við félagið.

Tottenham undirbýr sig nú fyrir tímabil í Meistaradeild Evrópu, í kjölfar þess að hafa unnið Evrópudeildina á síðustu leiktíð.

Liðið þarf hins vegar að stórbæta sig heima fyrir eftir að hafa hafnað í 17. sæti ensku úrvalsdeildarinnar í vor.