Crystal Palace hefur staðfest að John Textor hafi samþykkt að selja hlut sinn í félaginu. Gerir hann þetta svo félagið eigi möguleika á að spila í Evrópudeildinni á næstu leiktíð.

Palace vann sér inn þátttökurétt í Evrópudeildinni á næstu leiktíð með því að vinna enska bikarinn, sinn fyrsta stóra titil, í vor. Eins og staðan er núna má liðið hins vegar ekki taka þátt þar vegna eignarhalds Textor.

Hann á 43 prósent í Palace en á einnig hlut í franska félaginu Lyon, sem tekur þátt í Evrópudeildinni. Ekki er heimilað að eiga meira en eitt félag í sömu keppni. Verði Palace dæmt úr Evrópudeildinni gengur heldur ekki að liðið verði fært niður í Sambandsdeildina. Er það vegna þess að David Blitzer, sem einnig á hlut í félaginu, er meirihlutaeigandi í danska stórliðinu Bröndby, sem tekur þátt í keppninni.

Nú hefur Textor ákveðið að selja sinn hlut fyrir um 190 milljónir punda og er kaupandinn Bandaríkjamaðurinn Woody Johnson, sem er eigandi ameríska fótboltaliðsins New York Jets.

Það er þó ekki enn ljóst hvort þetta dugi til að Palace fái grænt ljós til að spila í Evrópudeildinni á næstu leiktíð, en þetta eykur líkurnar.