Halldór Árnason, fyrrum þjálfari Breiðabliks, var gestur Helga Fannars Sigurðssonar í nýjasta þætti af Íþróttavikunni á 433.is.

Eins og flestir vita var Halldór látinn fara frá Blikum í haust, aðeins ári eftir að hafa gert liðið að Íslandsmeisturum á sínu fyrsta tímabili sem aðalþjálfari.

„Auðvitað kom þessi ákvörðun á óvart. Sérstaklega í ljósi þess að ég held að árangurinn heilt yfir hafi verið nokkuð ásættanlegur. Við urðum Íslandsmeistarar, unnum deildabikarinn, tryggjum okkur svo í deildarkeppni Evrópu, þess vegna kom þetta á óvart,“ sagði Halldór.

Hann greindi frá því í viðtali við Fótbolta.net á dögunum að ónefndur aðili í kringum félagið hafi reynt að búa til óróa innan hópsins. Leikmenn létu hann vita af þessu.

„Ég átta mig líka á að í þessum bransa snýst þetta um að vinna leiki og við unnum ekki nógu marga leiki. Svo nefndi ég líka að ég hafi heyrt frá leikmönnum að það hafi verið kannað hvernig klefinn er og hvort þjálfarateymið væri eitthvað að missa þetta. Það svar var bara í samhengi við þá spurningu, hvort þetta hafi komið manni á óvart.

Ég var ekki reiður, bara svekktur. Það er ýmislegt sem hefur gengið á í félaginu í langan tíma. Hlutir sem hafa einhvern veginn ekki verið ræddir og kannski var þetta þægilegasta lausnin,“ sagði Halldór en vildi ekki fara nánar fara út í þá hluti.

Halldór var spurður nánar út í ummæli sín um ónefnda aðilann sem reyndi að skapa óróa.

„Það var alls ekki tilgangurinn að fara að finna einhverja blóraböggla. Það var fínt að setja upp smá samkvæmisleik fyrir ykkur. Það var ekki tilgangurinn. Kom þetta á óvart? Já, en út af þessu þá var þetta einhvers staðar þarna.

Þetta er mjög langt viðtal og það fer fram og til baka. Svo er það sett saman á einhvern hátt og þá er auðvelt að klippa þetta út. Ég í alvörunni áttaði mig ekki á að þetta yrði það sem menn tækju út úr þessu,“ sagði Halldór.

„Leikmenn koma til mín og segja mér þetta þá sneri það að einhverjum einstaklingi en hvort hann talaði fyrir sjálfan sig eða einhvern annan sagði ég ekkert um. Það voru ekki mín orð. Þetta sneri bara að svari mínu um hvort þetta hafi komið mér á óvart,“ útskýrði hann nánar.

Umræðan í heild er í spilaranum.