Arnar Gunnlaugsson landsliðsþjálfari segir að ekki megi horfa of mikið í úrslitin í fyrri leiknum gegn Aserbaísjan þegar kemur að seinni leiknum eftir rúma viku. Markmiðið er þó skýrt, að vinna leikinn.

Strákarnir okkar unnu frábæran 5-0 sigur á Aserbaísjan í fyrsta leik á Laugardalsvelli en liðin mætast í Bakú í næstu viku. Sigur tryggir hreinan úrslitaleik við Úkraínu um umspilssæti fyrir sæti á HM, þar sem Ísland verður vonandi með pálmann í höndunum.

„Mér finnst sá leikur líta betur og betur út. Leikirnir eru erfiðir í þessum alþjóðlega fótbolta. Við áttum stórkostlegan leik en einhverra hluta vegna fór hann framhjá fólki, þetta var bara sjálfsagt mál. Það hefur komið í ljós að þetta er frambærilegt lið, náðu í jafntefli við Úkraínu og voru næstum búnir að ná í tvö,“ segir Arnar um fyrri leikinn.

Auk þess að vinna Asera tapaði Ísland naumlega fyrir Frökkum í fyrstu leikjum undankeppninnar. Við tók svekkjandi tap gegn Úkraínu en svo glæsilegt jafntefli við Frakkland hér heima. Ísland mætir Úkraínu á ný þremur dögum eftir leikinn við Aserbaísjan.

„Við þurfum ekki að vinna 5-0 aftur, bara vinna hann. Leikplanið mun gefa skýra mynd af því sem við þurfum að gera. Eftir leikinn á móti Úkraínu varð ljóst að við megum ekki henda leikjunum frá okkur. Jafnteflið gegn Frökkum gerði mjög skemmtilega hluti fyrir okkur, ekki bara stigalega heldur þurfa þeir að tryggja sitt sæti endanlega með því að vinna Úkraínu svo vonandi gera þeir sjálfum sér og okkur þann greiða að við þurfum að sækja stig til að klára okkar, að því gefnu að við klárum leikinn við Asrerbaísjan.“

Ítarlegt viðtal við Arnar er í spilaranum hér ofar. Þar fer hann einnig vel yfir valið á leikmannahóp sínum fyrir komandi leiki.