Fyrrum dómarinn David Coote rauf í gær þögnina í fyrsta sinn síðan hann var rekinn úr starfi fyrir hneykslismál. Um leið opinberaði hann að hann væri samkynhneigður.

Coote var rekinn í desember í kjölfar þess að gömul myndbönd fóru í dreifingu af honum. Í öðru þeirra lýsti hann yfir vanþóknun sinni á Jurgen Klopp, fyrrum stjóra Liverpool. Var það myndband tekið í kórónuveirufaraldrinum.

Meira
Staða dómarans versnar hratt – Nú var myndband af honum að taka kókaín á miðju móti að leka út

Hitt myndbandið á að hafa verið tekið á meðan EM síðasta sumar stóð yfir. Þar mátti sjá Coote innbyrða kókaín, daginn eftir að hafa starfað í VAR-herberginu á leik Spánar og Þýskalands í 8-liða úrslitum.

Í kjölfar rannsóknar var hann rekinn af dómarasamtökunum.

„Ég skammaðist mín mikið á unglingsárunum. Ég kom ekki út fyrir foreldrum mínum fyrr en ég var 21 árs. Ég kom ekki út fyrir vinum mínum fyrr en ég var 25 ára,“ segir Coote í viðtali við The Sun.

„Kynhneigð mín er ekki það eina sem kom mér í þessa stöðu. En ég er ekki einlægur ef ég segi ekki að ég sé samkynhneigður og að ég hafi átt í vandræðum með að fela það. Ég faldi tilfinningar mínar sem ungur dómari og kynhneigð mína einnig. Það er góður eiginleiki sem dómari en hræðilegur eiginleiki sem manneskja. Þetta hefur leitt mig inn á braut alls konar hegðunnar.

Ég hef þurft að þola alls konar áreiti á ferli mínum sem dómari. Að opinbera að ég sé samkynhneigður ofan á það allt saman hefði verið mjög erfitt.“

Þá gaf Coote einnig út yfirlýsingu sem var birt á Sky Sports.

„Þetta hefur verið einn erfiðasti kafli lífs míns. Ég tek ábyrgð á gjörðum mínum. Mér þykir svo leitt að hafa komið illa fram og þann neikvæða blett sem þetta setti á leikinn sem ég elska,“ segir Coote þar.

„Ég vona að fólk geti skilið að þetta voru augnablik sem voru tekin upp á mjög erfiðum tíma í mínu einkalífi. Þau endurspegla ekki hver ég er í dag eða hvað mér finnst.

Nú einbeiti ég mér að andlegri heilsu minni og velferð. Ég vona að reynsla mín, innan vallar sem utan, komi að góðu fyrir fótboltann einhvern tímann í framtíðinni. Ég vil þakka öllum fyrir stuðninginn undanfarið, sérstaklega fjölskyldu minn, vinum, fyrrum samstarfsmönnum, dómarasamtökunum, Howard Webb og svo miklu fleirum.“