„Þetta er þungt,“ sagði Arnór Ingvi Traustason miðjumaður Íslands í samtali við 433.is eftir 2-4 tap gegn Tyrkjum í kvöld í Þjóðadeildinni.

Arnór kom inn í byrjunarliðið í kvöld og átti ágætis leik en hvernig horfði leikurinn við honum?

„Við fáum 1-0 frekar snemma og við náum að halda í það og erum þéttir, svo í seinni þá fáum við snemma á okkur mark og þetta verður fram og til baka leikur.“

„Við hefðum getað tekið utan um leikinn betur, 2-2 þá finnst mér við vera með þá. Við fáum þennan skell og þeir fá augnablikið.“

Ísland fékk dæmt á sig tvær vítaspyrnur í leiknum þar sem VAR tæknin var notuð, Tyrkir skoruðu aðeins úr annari spyrnu sinni þar. Í fyrri spyrnunni fór Hakan Çalhanoğlu á punktinn eftir að boltinn fór í hendina á Sverri Inga. Hakan rann hins vegar á punktinum og sparkaði boltanum í vinstri fót sinn og þaðan í markið.

Dómari leiksins hafði því engan annan kost en að dæma markið af. Völlurinn í Laugardalnum er háll og það hafði líklega áhrif.

Íslendingar vildu fá vítaspyrnu eftir þetta en ekki var farið í skjáinn þegar augljóst var að boltinn fór í hönd Tyrkjans á línunni. Urðu margir Íslendingar reiðir út í pólska dómara leiksins.

„Ég nenni ekki að grenja yfir dómaranum, hann hefði mátt skoða þetta,“ sagði Arnór Ingvi.