Newcastle goðsögnin Alan Shearer rifjaði nýverið upp ótrúlega sögu af hótelherbergi nóttina áður en hann stýrði liði sínu í afar mikilvægum leik.
Það var vorið 2009 sem Newcastle þurfti að vinna Aston Villa á lokadegi ensku úrvalsdeildarinnar til að halda uppi, en það tókst ekki. Shearer var þarna bráðabirgðastjóri Newcastle en nóttin fyrir leikinn var ekkert grín.
Hann gisti á hóteli ásamt þjálfarateymi sínu og lagði til að menn fengju sér nokkra drykki fyrir svefninn til að róa taugarnar. Það gerði hann sjálfur og fór svo upp í rúm skömmu fyrir miðnætti. Þá tók hins vegar við ótrúleg atburðarrás.
„Klukkan var 3-4 um nótt. Ég hélt mig væri að dreyma. Ég heyrði einhver hljóð koma frá píanóinu á svítunni. Ég hugsaði: Það er einhver í herberginu, ertu að grínast? Það hætti svo í smá en fimm mínútum síðar heyri ég fólk tala saman og ég heyri líka annað,“ rifjar Shearer upp og heldur áfram.
„Ég fer á fætur og er frekar hræddur og stressaður. Ég fer fram og ég er ekki að grínast í ykkur, það var fólk á píanóinu að stunda kynlíf. Ég hugsaði hvað ég ætti að gera, hvort ég ætti að öskra. Ég kallaði „Gerðu mér greiða maður“ og þau ruku út úr herberginu. Ég trúði ekki því sem var að gerast.“
Shearer segist ekki enn vita hvernig þetta gat gerst. „Kannski var þetta starfsfólk sem hélt að herbergið væri mannlaust.“
Þetta gaf að minnsta kosti ekki góð fyrirheit fyrir leikinn daginn eftir. Newcastle tapaði 1-0 og féll.
