Óskar samdi við félagið í október í fyrra en þar áður hafði náð eftirtektarverðum árangri með Breiðablik og meðal annars komið liðinu í riðlakeppni Sambandsdeildarinnar. Undir stjórn hans hafði Haugesund aðeins spilað sex leiki í norsku úrvalsdeildinni á leiktíðinni, unnið tvo og tapað fjórum.
Fyrir helgi fjallaði norski miðillinn TV2 um málið þar sagði að Óskar hafði viljað taka með sér sinn eigin aðstoðarmann þegar hann tók við Haugesund á sínum tíma en fékk það ekki í gegn. Sancheev Manoharan var því honum til aðstoðar. Sá var aðalþjálfari undir lok síðustu leiktíðar og hélt liðinu uppi.
Meira
Óskar Hrafn óvænt hættur með Haugesund – „Þetta er mikið sjokk“
Óskar og Manoharan eru sagðir hafa náð illa saman en miðað við sögur sem nú ganga sóttist sá síðarnefndi eftir starfi Óskars.
„Maður hefur heyrt að aðstoðarþjálfarinn, sem var þjálfari liðsins undir lok síðasta tímabils, hafi hreinlega verið að grafa undan honum,“ segir Jóhann Már Helgason sparkspekingur í nýjasta þætti Dr. Football.
„Þetta er það sem menn hafa rætt,“ skaut þáttastjórnandinn Hjörvar Hafliðason inn í áður en Jóhann tók til máls á ný.
„Hann kemur þarna aleinn einhvern veginn og aðstoðarmaðurinn vildi greinilega vera í hans hlutverki. Kannski ætlaði hann sér bara að reyna að bola honum út. Maður veit ekki hvað hefur átt sér stað en Óskar er alvöru prinsippmaður og lætur ekki bjóða sér hvað sem er.“
Arnar Sveinn Geirsson telur að það hafi getað verið erfitt fyrir Manoharan að þurfa að kyngja því að verða aðstoðarþjálfari eftir að hafa stýrt liðinu í haust.
„Þetta er alveg eins og í öðrum vinnum. Þú ert að færa einhvern niður sem var yfirmaður, það særir egóið. Ég get ímyndað mér að það hafi verið erfitt fyrir aðstoðarþjálfarann. Þá labbar Óskar inn í erfitt umhverfi,“ segir Arnar.
Meira
Norskum almenningi brugðið yfir fréttum af Óskari – „Hvað í fjandanum?“
