Sparkspekingurinn og Liverpool goðsögnin Jamie Carragher telur að Manchester City sé enn liðið sem hans menn þurfa að horfa í að skáka til að hampa Englandsmeistaratitlinum í vor.

Liverpool og City mættust í gríðarlega mikilvægum leik í toppbaráttu ensku úrvalsdeildarinnar í gær. Honum lauk með 1-1 jafntefli og er Arsenal þar með komið á toppinn, á undan Liverpool á markatölu og stigi á undan City.

Þrátt fyrir það hefur Carragher meiri áhyggjur af City en Arsenal.

„Ef þú ert Arsenal hugsarðu sennilega að þetta hafi verið besta niðurstaðan (jafnteflið í gær). En ef þú ert Liverpool og sérð að Arsenal er að spila við City eftir nokkrar vikur hugsarðu sennilega það sama. Frá þeirra sjónarhorni held ég að þeir séu enn að eltast við City,“ segir Carragher.

Arsenal og City mætast í næsta leik liðanna í ensku úrvalsdeildinni.

„Þó Arsenal sé í efsta sæti myndi ég halda að Liverpool vilji frekar að þeir vinni City af því ég tel að City fái fullt hús í síðustu 5-6 leikjunum. Ef þeir tapa engum stigum í næstu leikjum verður ansi erfitt að sigra þá.“