Björn Bragi Arnarsson segir að sér finnist enn hálf ótrúlegt að félagi sinn, Hannes Þór Halldórsson, hafi varið víti frá Lionel Messi á Heimsmeistaramótinu í Rússlandi 2018. Hann segir fyrrum landsliðamarkvörðinn þó aldrei minnast á afrekið að fyrra bragði.

Uppistandarinn og athafnamaðurinn er gestur í nýjasta þætti Chat After Dark, þar sem hann var meðal annars spurður út í afrek Hannesar.

„Að verja víti frá Messi er ótrúlegt. Það er ótrúlegt, hafandi þekkt Hannes í Versló, hvað hann er búinn að afreka mikið. Það er bara galið,“ segir Björn.

„Hann talar ekki um þetta. Þetta er bara orðin einhver klisja. Þetta er svo ótrúlegt móment.“

Björn segir fólk enn koma upp að Hannesi og ræða vörsluna frá Messi.

„Við æfum saman í Laugum og síðast fyrir viku kom einhver: „Pælið í því, þessi maður varði víti frá Messi.“ Það eru liðin einhver fimm ár síðan.“

Björn segir að hann hefði aldrei getað giskað á hversu langt Hannes næði á ferli sínum í fótboltanum.

„Þegar ég kynntist honum vissi ég ekki einu sinni að hann væri að æfa fótbolta.

Ef það er einhver sem getur sýnt að dugnaður og eljusemi borgi sig þá er það hann. Hann ætlaði sér að ná langt.“