Í síðasta mánuði héldu FH-ingar samstöðufund í Kaplakrika í tilraun til að snúa við afar döpru gengi karlaliðsins.

FH hefur heilt yfir átt skelfilegt tímabil í Bestu deildinni. Liðið er í fallsæti þegar henni hefur nú verið skipt upp.

Eiður Smári Guðjohnsen, þjálfari FH, var gestur í hlaðvarpsþættinum Steve Dagskrá á dögunum, þar sem hann var meðal annars spurður út í „krísufundinn.“

„Þetta var í rauninni ekki krísufundur. Stuðningsmannahópurinn, þessir helstu, sem eru búnir að vera þarna í mörg ár og eru miklir FH-ingar, við vildum gefa þeim aðeins betri tengsl við okkur sem þjálfarateymi hverjar pælingarnar voru, hvað er að gerast hjá okkur innan liðsins,“ segir Eiður.

Hann segir að menn hafi snúið bökum saman á fundinum. Eftir hann var gengið töluvert skárra og stemningin betri.

„Það var kannski jákvætt að fá svona skell í leiknum í Vestmannaeyjum og segja „við komumst nú ekki mikið dýpra en þetta drengir.“ Bæði við sem hópur, leikmenn og þjálfarateymi náðum allt í einu að snúa þessu við, búa til smá stemningu.“

Þrátt fyrir dapurt gengi í deildinni er FH komið í úrslitaleik Mjólkurbikarsins. Þar mætir liðið Víkingi Reykjavík á laugardag.